Şəhidlərimizin adını əbədiləşdirmək məqsədilə niyə bir PLATFORMA YARADILMIR? - AÇIQLAMA

44 günlük müharibə və antiterror əməliyyatlarında şəhid olan igidlərimizin adının əbədiləşdirilməsi məsələsi daim dövlətimizin diqqət mərkəzindədir. Tikilən məktəblərə, küçələrə, adların verilməsi və ailələrin yaşadığı yerlərdə adların vurulduğu lövhələrin əks olunması çox vacibdir. Amma Vikipediya kimi tanınan qlobal platformada şəhidlərin məlumatlarının silinməsi hörmətsizlikdir.

Bəs Azərbaycanda şəhidlərinin adlarının əbədiləşdirilməsi ilə bağlı yeni bir platforma yaradıla bilərmi? Mövzu ilə bağlı Sonxeber.az-a danışan Azərbaycan İnformasiya və Kommunikasiya Texnologiyaları Sənayesi Assosiasiyası İctimai Birliyinin İdarə Heyətinin sədri Elvin Abbasov bildirib ki, Azərbaycanda şəhidlər haqqında məqalələr dərc edən geniş kitablar, saytlar və internet resurslar mövcuddur:

"Bu istiqamətdə QHT-lər, fərdi təşəbbüskarlar tərəfindən ciddi işlər görülüb. Həmin platformalarda elektron kitab və məqalələr dərc olunur. Eyni zamanda Azərbaycanda vikipediyaya bənzər bir çox resurslar var. Vikipediyanın erini verməsə də eyniləşdirilmiş platformalar var. Bu gün həmin platformaların adları cəmiyyət arasında o qədər tanınmır. Platformaların reputasiyası onların tanınmışlığı ilə ölçülür".

Ekspertin sözlərinə görə, hər kəs bu gün bir platforma yarada bilər. "Microsoft", "Google" kimi beynəlxalq platformalar Vikipediyadan qidalanır. Bu baxımdan Vikipediya daha əhəmiyyətli hesab olunur:

"Azərbaycanda Vikipediya platformasının bir çox oxşarı var və ara üzləri belə eyniləşdirilib. Saytların reklamı və inkişaf etdirilməsi maddi vəsait tələb edir. Bu gün dövlət şirkətlərə və QHT-lərə şərait yaradıb. Həmin saytlar dövlət dəstəyi hesabına yaradılsa da, saytların və elektron resursların tanınması ilə bağlı kifayət qədər işlər aparılmır. Texniki imkanlar gücləndirilməli və maddi vəsait artırılmalıdır. Əks halda platformaların reputasiyası artmaycaq".

Telegramda izləyin

instagramda izləyin