Universitetlərdə erməni dili tədris OLUNA BİLƏR? - AÇIQLAMA

Bu gün bir çox erməni Azərbaycan dilində sərbəst danışa bilirlər. Ermənistanda Azərbayan və digər türk dillərinin tədrisinə orta məktəbdən başlayırlar. Onlara görə bütün hallarda düşmənin dilini bilmək üstünlükdür. Azərbaycanda bu dili öyrənmək istəyənlər var. Amma bir çox vətəndaşın erməni dilinin tədrisi və öyrənilməsi ilə bağlı münasibəti birmənalı deyil. Bu gün Ermənistanın siyasi arenada nümayiş etdirdiyi "şou"nu ifşa etmək, eyni zamanda onları yaxından tanıtmaq üçün onların dilini bilmək vacibdir.

Sosial şəbəkələrdə bu mövzu hər zaman müzakirələrə səbəb olur. Bu gün ermənilərin tarixən törətdiyi cinayətlər, xalqızımın başına açdığı faciələr ucbatından Azərbaycanda bu dili öyrənmək istəmirlər. Məktəblərdə olmasa da, ən azından ali təhsil müəssislərində erməni dili tədris oluna bilərmi?

Mövzu ilə bağlı Sosial Tədqiqatlar Mərkəzinin əməkdaşı, təhsil tədqiqatçısı Elmin Nuri Sonxeber.az-a açıqlama verib:
"Dünyanın hər yerində belə bir qayda var ki, düşmənin və rəqibin dilini mükəmməl şəkildə bilmək lazımdır. Tarix boyu, xüsusən müharibələr və proseslər zamanı düşmənin dilini bilmək böyük fayda verir. Bu məsələnin zaman-zaman şahidi olmuşuq. Bizim igid əsgərlərimiz və zabitlərimiz ilə bağlı sənədli filmləri izləyəndə görürük ki, onlar əməliyyatda əsas şəxs kimi iştirak edirlər. Bu hər yerdə belədir".

Ekspertin sözlərinə görə, erməni dilinin tədrisi universitet daxilində ola da bilər, olmaya da bilər:

"Amma xüsusi mərkəzlər və universitetlər tərəfindən bu dil öyrənilməlidir. Zaman-zaman belə addımlar atılıb. Bu gün istənilən dili internetdəki resurslardan və proqramlardan öyrənə bilirik. Məsələ erməni dili deyil. Bu günləri xeyli uşaq müstəqil şəkildə italyan, koreya kimi bir çox dilləri öyrənməyə cəhd edirlər. Təbii ki, bir mütəxəssisin yanında dilləri öyrənmək daha rahatdır. Amma bunu müstəqil şəkildə etmək mümkündür. Yəni biz erməni dilinin öyrənilməsinin əleyhinə ola bilmərik".

Telegramda izləyin