Mağazalar endirim "kampaniyası" adı ilə alıcıları belə aldadır - AÇIQLAMA

Son günlər sosial şəbəkələrdə alıcılar mağazaların endirim saxtakarlığını müzakirə edir. Belə ki, bir çox mağazalar endirim reklamları ilə insanları cəlb edir. Müştərilər mağazaya gəldikdə endirimin ən səliqəsiz, alınmayan məhsullara tətbiq olunduğunu görürlər.

Bəs görəsən mağazaların endirim saxtakarlığının səbəbi nədir ?

Mövzu ilə bağlı Sonxeber.az – a açıqlama verən iqtisadçı Natiq Cəfərli bildiirib ki, qanunvericilikdə bununla bağlı heç bir müddəa yoxdur:

"Qanunvericilikdə bunu tənzimləyən müddəalar yoxdur. Çünki bizdə qiymətin təyin olunmasında dövlətin müdaxilə imkanları ancaq tarif şurası tərəfindən tənzimlənən qiymətlərə aiddir. Digər hallarda mağaza sahibi istənilən malı istədiyi qiymətə sata bilər. Sahibkarın yeganə öhdəliyi satışdan əldə etdiyi gəlirdən vergi ödəməkdir. Onun başqa öhdəliyi və ya tənzimləmə mexanizmi yoxdur. Sadəcə dünyada belə bir yanaşma var ki, mağazalar endirimlərlə bağlı belə addımlar atanda bu bir ictimai qınağa çevrilir. Sosial şəbəkələrdə həmin mağaza qınanır. İctimai rəy formalaşır və insanlar həmin mağazalara getmirlər.

Azərbaycanda endirimlə bağlı olan problemlər illərdir müzakirə olunur. Çox zaman endirim kompaniyalarından əvvəl qiymət kəskin artılır və sonra artmış qiymətə endirim tətbiq olunur. Beləliklə mallar faktiki olaraq əvvəlki qiymətinə qaytarılıb endirim adı ilə satışa qoyulur.

Bu sadəcə mağazalar arasında rəqabətli mühitlə həll ediləcək bir məsələdir. Qanunvericilikdə hansısa qaydanın tətbiq edilməsi bu məsələni həll etməyəcək".

Çiçək Sadatova

Telegramda izləyin