"Anım Günü"nə qədər şəhid ailələrinə verilən təqaüdlər ARTIRILSIN - TƏKLİF

Sentyabrın 27-si Azərbaycan Respublikasında "Anım Günü" kimi qeyd olunur. Qanunvericiliklə hər şəhid ailəsinə hər şəhidə görə ayda 600 manat məbləğində təqaüd verilir. "Anım Günü" ilə əlaqədar şəhid ailələrinə verilən təqaüd artırıla bilərmi?

Mövzu ilə bağlı Sonxeber.az-a danışan hərbi ekspert Üzeyir Cəfərov bildirib ki, bu mövzu kifayət qədər müzakirə edilir. Mətbuatın və ictimaiyyətin bu məsələ ilə bağlı səsləndirdiyi fikirlərdən aydın olur ki, şəhid ailələrinə verilən müavinət yetərli deyil:

"Həmin məbləğ bugünkü tələblərə cavab vermir. Bunu başa düşmək lazımdır. Milli Məclisdə bu məsələlərə diqqət ayrılmır. Dövlət şəhid ailələri və qaziləri ilə ən yüksək səviyyədə maraqlanmalıdır. Deyə bilərlər ki, şəhid ailələrinə xüsusi diqqət ayrılır. Amma təəssüf ki, müharibədən 4 il keçməsinə baxmayaraq hələ də bəzi şəhid ailələrinin sosial vəziyyətində problemlər var. Bu da xoşagəlməz söz-söhbətlərə səbəb olur".

Ekspertin sözlərinə görə, bu şəhid ailələrinin sosial vəziyyətinin yaxşılaşdırılması ilə bağlı addımlar atılmalıdır:

"Bir-iki tanınmış şəhid ailəsini daimi olaraq televiziya və KİV-lərdə göstərməklə vəziyyət həll olunmur. Buna görə də hesab edirəm ki, bu məsələ tezliklə öz həllini tapmalıdır. Mən ümid edirəm ki, Milli Məclisin yeni komitə üzvləri tez bir zamanda bu mövzunu gündəmə gətirərlər.Şəhid ailələri bu problem bir çox insanı narahat edir. Dövlət büdcəsində kifayət qədər vəsait var. Sadəcə olaraq həmin vəsaiti düzgün yönləndirmək lazımdır. Qarşıda "Anım Günü" gəlir. Həmin müddətə qədər şəhid ailələrinə verilən təqaüd artırılmalıdır".

Telegramda izləyin