Veteranlara verilən pul 270 manata qaldırılsın - TƏKLİF

Bu gün ən çox müzakirə edilən mövzulardan biri də veteranlara verilən 80 manat təqaüdün artırılmasıdır. Müharibə veteranlarına verilən 80 manat çox azdır. Həmin məbləğ bir veteranın gündəlik ehtiyacını qarşılamır. Hətta müharibə veteranlarının bəziləri o pulu özlərinə dərman almaq üçün istifadə edir.

Belə olan təqdirdə veteranlara verilən 80 manat 27 sentyabr - "Anim Günü"nə kimi nə qədər artırıla bilər?

Mövzu ilə bağlı Sonxeber.az-a danışan sosioloq Elçin Bayramlı hesab edir ki, yaşayış üçün zəruri olan ərzaq və qeyri-ərzaq məhsullarının qiymətlərini nəzərdən keçirdikdə bəzi sosial müavinətlərın məbləği çox aşağıdır:

"Xüsusilə müharibə iştirakçıları və qəhrəmanlarına verilən pullar çox azdır. 80 manat müharibə iştirakçısına verilir və bu məbləğ onun nəqliyyat xərclərini belə ödəmir. Belə olan təqdirdə bu yardımın verilməsinin heç bir mənası qalmır. Ola bilsin ki, dövlət 10 minlərlə müharibə iştirakçısına yüksək məbləğ verə bilmir. Heç olmasa burada differensial yanaşma qoyula bilər. Məsələn ölkədə yaşayış minimumu 270 manatdır. Elə bir forma olmalıdır ki, müharibə iştirakçısı işsizdirsə, əlildirsə onun müavinəti 80 manat 270 manat olsun. Düşünürəm ki, veteranlara verilən müavinət 270 manata çatdırılmalıdır. Dövlətimizin bu məbləği qaldırmaq imkanları var. Ən azı bu məbləği 150-200 manata çatdırmaq olar".

Sosioloqun sözlərinə görə, veteranlara verilən müavinət ən azı yaşayış minimumu qədər olmalıdır:

"Veteranlar da kateqoriyaya bölünməlidir. Yəni elə müharibə iştirakçısı var ki, işləyir və 1000 manat maaş alır. Onun sosial vəziyyətində elə də çətinlik yoxdur. Amma elə veteranlar var ki, onların işi yoxdur, xəstə və əlildir. O, ancaq sosial yardımla yaşaya bilər. 80 manat həmin veteranın heç çörək pulu belə etmir. Elə bir yanaşma olmalıdır ki, balanslaşma olsun. Müharibə veteranları arasında vəzifəsi, evi və maşını olanlar var. Amma bəziləri işsizdir və vəziyyəti ağırdır. 50-100 min nəfərin müavinətini artırmaq istəmirlərsə, heç olmasa sosial vəziyyəti aşağı olanlara əlavə yardımlar edilsin. Bu insan öz vətəni qarşısında borcunu yerinə yetirib. İndi isə həmin veteranların minimum sosial ehtiyatları təmin edilməlidir. Büdcə profisitlərində qalan vəsait sosial layihələrə yönləndirilməlidir. Bu gün uşaq pulunun verilməsi və veteranlara verilən müavinətin artırılması ilə əlaqədar kifayət qədər vəsaitimiz var".

Telegramda izləyin

instagramda izləyin