Sağlamlıq problemi olan çağırışçı niyə əsgər aparılır? – AÇIQLAMA

Azərbaycan Ordusunun hərbi qulluqçusu Əsədli Əsgər Firuz oğlu kəskin ürək və ağciyər çatışmazlığından vəfat edib. Bu barədə Müdafiə Nazirliyindən bildirilib:

"Azərbaycan Ordusunun hərbi qulluqçusu Əsədli Əsgər Firuz oğlunun səhhətinin qəfil pisləşməsi səbəbindən tibb müəssisəsinə təxliyə olunarkən kəskin ürək və ağciyər çatışmazlığından vəfat etməsi faktını təsdiq edirik."

Bəs görəsən ciddi sağlamlıq problem olan çağırışçı niyə əsgər aparılır?

Mövzu ilə bağlı Sonxeber.az-a açıqlama verən hərbi ekspert Səxavət Məmməd bildirib ki, bu problemin günahı Səfərbərlik xidmətindədir:

"Bu problemin günahı ordudan daha çox həmin gənci orduya göndərən səfərbərlik xidmətindədir. Orduya çağırılanlarla bağlı əlavə yoxlamalar olur. Bu işə də Əmək və Əhalinin Sosial Müdafiəsi Nazirliyi baxır. Bu məsələdə günahı olan qurumların sayı çoxdur. Elə vaxt olur ki, çağırışçı gəlir və sağlamlıq problem olduğunu deyir. Səfərbərlik xidməti onu problem ilə bağlı hansısa xəstəxanaya rəy almaq üçün göndərir. Amma sonra elə bir vəziyyət yaranır ki, həmin rəyi digər kommisiyalar qəbul eləmir. Bununla bağlı valideyinlərin çoxsaylı şikayətləri var. Onlar açıq şəkildə bildirirlər ki, uşaq xəstədir, sağlamlıq problemi var. Amma onlara məhəl qoyan olmur. Güya bu addımı əsgərlikdən yayınmanın qarşısını almaq üçün atırlar. Hesab edirəm ki, bu məsələnin üzərinə ciddi şəkildə düşülməlidir. Tibb kommisiyları ciddi şəkildə işləməlidirlər. Əgər sağlamlıq problem olan gənclər bu şəkildə əsgərliyə aparılmağa davam edərsə bizi ciddi problemlər gözləyir. Bundan əlavə, indiki gənclər arasında psixoloji problemlər də var. Çağırışçıları əsgər aparan zaman bütün bunlar nəzərə alınmalıdır. Dövlət bu işə ciddi şəkildə nəzarət etməlidir. Əks halda bu tip halların sayı çoxalacaq və qeyri-döyüş şərtində əsgər ölümlərinin hələ çox şahidi olacağıq".

Çiçək Sadatova

Telegramda izləyin

instagramda izləyin