Sərnişin sıxlığı olan avtobus sürücüləri cəzalandırıla bilərmi? – AÇIQLAMA

Hər gün ictimai nəqliyyatda rastlaşdığımız problemlərdən biri də avtobuslardakı sərnişin sıxlığıdır. Maraqlısı budur ki, avtobusda yer olmamasına baxmayaraq sürücülər sərnişin qəbul etməyə davam edir. Bəs görəsən bu sürücüləri hər hansı cəza gözləyirmi?

Mövzu ilə bağlı Sonxeber.az – a açıqlama verən nəqliyyat eksperti Elməddin Muradlı bildirib ki, bütün dayanacaqlarda dayanmaq sürücülərin borcudur:

"Bütün avtobusların standartı var - oturacaqda neçə, ayaqüstə neçə sərnişin daşıya bilər. Real olaraq da bu sərnişinləri saymaq mümkün deyil. Amma biz bəzən görürük ki, avtobus ağzına kimi dolu olsa da yenə sərnişinlər minir. Sərnişin götürmək məcburiyyətində qalan sürücüləri də anlamaq lazımdır. Çünki sürücü bütün dayanacaqlarda dayanmalıdır. Bu onun borcudur. Avtobus dayananda da tələsən, evinə tez çatmaq istəyən vətəndaşlar sıxlaşıb minirlər. Onları da anlamaq lazımdır. Sürücü vətəndaşa minmə düş deyə bilməz. Onun borcu bütün dayanacaqlarda dayanmaqdır. Dayanır və insanlar da minir. Bunun başqa bir yolu yoxdur. Düşünürəm ki, problemi kökündən həll etmək lazımdır. Bunun üçün də ölkəyə çoxlu avtobuslar gətirilməlidir".

Çiçək Sadatova

Telegramda izləyin