Azərbaycanda göz rənginin dəyişdirilməsi əməliyyatı qadağa oluna bilər - AÇIQLAMA

Son dönəmlərdə məşhur olan keratopiqmentasiya - göz rənginin dəyişdirilməsi əməliyyatına üz tutanların sayı çoxalmaqda davam edir. Azərbaycanda da məşhurlaşan daha çox xanımların müraciət etdiyi bu əməliyyatın təhlükələri ilə bağlı bir çox həkim fikrini bildirib.Hətta sözügedən əməliyyatın korluğa səbəb ola biləcəyi də məlumdur. Bu səbəbdən də
keratopiqmentasiya əməliyyatı qadağan oluna bilərmi?

Mövzu ilə bağlı Sonxeber.az-a sosioloq Lalə Mehralı danışdı.

Sosioloq açıqlamasında sözügedən mövzunun gələcək zamanda daha da betər hal alacağını, bu səbəbdən də həmin əməliyyatla bağlı ciddi qərar qəbul edilməsi gərəkdiyini vurğuladı:

"Müasir tibb inqilab edir desək, bəlkə də ən doğru ifadəni işlətmiş olarıq. Amma bu inqilab həmişə insanlığın xeyrinə olmur, onu da etiraf edək. İnsanlar bir şeyin fərqində deyil ki, bu istəklərin arxasında böyük risklər də var. İnsan digər əzalarını kəsdirib biçdirə bilir deyə gözü üçün də bu riskə girir, lakin göz kimi zərif orqanın bu riskə dözməyəcəyi ehtimalını düşünmür.

Göz rəngini dəyişmə əməliyyatının təhlükələri haqqında dünya mətbuatında, The Guardian, Daily Mail kimi ciddi nəşrlərdə çox ciddi elmi-tibbi məqalələr dərc edilib, Amerika Qlaukoma Cəmiyyəti, Oftalmoloqlar Assosiasiyası, 32 min oftolmoloqun birləşdiyi Amerika Oftalmologiya Akademiyası bu prosedurun korluğa səbəb olacağını açıqlayıb, amma insanlar buna etinasız yanaşır.

Yaxşın gələcəkdə gözdən əlil insanların sayı sürətlə artacaq, hökumətlər bu əlilliyə görə pensiya ödəmək məcburiyyətində qalacaq. Bu da təbii ki dövlət büdcəsi üçün əlavə xərc olacaq. İnsanların könüllü, risklərinə etinasız yanaşaraq etdirdiyi bir əməliyyata görə dövlətin başqa bir xərcdən kəsib pensiya ödəməsi doğru deyil. Ona görə zənn edirəm ki bu məsələdə ciddi bir qərar qəbulu şərtdir".

Vüsalə İbrahimli

Telegramda izləyin