"30 il ərzində Minsk qrupu daha çox Azərbaycana işğallı qəbul etdirməklə bağlı olan bir fəaliyyət nümayiş etdirib" - DEPUTAT

"30 ildir ki, Ermənistan-Azərbaycan Dağlıq Qarabağ münaqişəsi davam etdiyi müddətdə bir neçə dövlət bu və ya digər formatda öz vasitəçilik missiyasını təklif etdi. Bunlardan daha çox ATƏT-in Minsk qrupu mandat üzərində həyata keçiriləcək bir vasitəçilik missiyasının reallaşdırılması ilə bağlı fəaliyyətə başlamışdı. Minsk qrupunun əsas məqsədi münaqişəni həll etmək idi".

Bunu Sonxeber.az-a danışan Milli Məclisin üzvü Azər Allahverənov bildirib.

Deputat qeyd edib ki, 30 ildə gedən proseslər göstərdi ki, Minsk qrupu daha çox Azərbaycanı işğalla barışdırmaq, ona bu reallığı qəbul etdirməklə bağlı olan bir fəaliyyət nümayiş etdirib:

"Nəticə etibarı ilə hətta bu və ya digər dönəmlərdə irəli sürdükləri münaqişənin həlli yolları ilə bağlı olan hər hansısa təklif və ya müzakirəyə çıxarılası bir sənəd var idisə, hətta o sənədə detallı şəkildə belə baxdıqda məlum olurdu ki, yenə də son nəticədə burada Azərbaycanın torpaqlarının müəyyən bir hissəsi işğal altında qalmalı və dövlətimiz bu reallığı qəbul etməklə növbəti mərhələyə daxil olmalıymış. Bundan başqa ayrı-ayrı dövrlərdə Azərbaycana müttəfiq olan dövlətlərin bu prosesdə iştirakına dair təşəbbüs irəli sürülürdü və belə bir vəziyyətdə yenə də qarşı tərəfin və onun havadarlarının təsiri, mənfi münasibəti və həmin vasitəçilikdən imtinası ilə sonlanırdı. Görünən bu idi ki, əsasən Ermənistana havadarlıq edən dövlətlərin danışıqlar prosesinə "vasitəçi" kimi daxil olması daha çox onların merkantil maraqlarının təmin olunmasına hesablanmış bir fəaliyyət idi. Burada guya Ermənistan Respublikası, o cümlədən erməni xalqının maraqlarını tərənnüm etməklə realda onlar Cənubi Qafqaz bölgəsinə daxil olmaqala buradakı mövqelərini gücləndirmək, bölgədə gedən proseslərə bir növ hakimlik etmək missiyasınə həyata keçirmək istəyirdilər. Təbii ki, sırf bu nöqteyi-nəzərdən hətta o fikiri də söyləyə bilərəm ki, bunların guya ki, erməni xalqının maraqlarına xidmət edəcək bir fəaliyyət sərgiləməklə əslində onlar bunun tamam əksini edirlər. Çünki, 44 günlük vətən müharibəsinin nəticəsində Azərbaycan nəinki, özünün 1/5 hissəsini işğaldan azad etmiş oldu. Həmçinin, Azərbaycan yeni müstəvidə sülh gündəliyini irəli sürdü. Bu gün bir çox proseslər və bir çox layihələr məhz Azərbaycanın təşəbbüskarlığı, onun lakomativdə gedən bir dövlət olaraq iştirakı ilə baş verir ki, artıq bu məsələlərdə Ermənistan Respublikası arxa plandadır".

Deputat vurğulayıb ki, müxtəlif dövlətlər, siyasi mərkəzlər, hətta beynəlxalq təşkilatlar da vasitəçiliyini təklif etmək niyyətindədirlər. Bununla bağlı maraqlarını hətta müəyyən mənada ifadə edirlər:

"Bu dövlətlər və siyasi mərkəzlər arasında həqiqətən də Cənubi Qafqaz bölgəsində sülh və təhlükəsizliyin təmin olunmasında maraqlı olan dövlətlər var. Xüsusiliklə də Azərbaycana tərəfdaş olan, strateji müttəfiqlik münasibətlərində olan dövlətlər də var. Müəyyən müsbət nəticələr daha çox vasitəçilər olmadan aparılan danışıqlar nəticəsində əldə olunmuş olur. Yenidən vasitəçilik missiyasının bu prosesə təsiri və yeri barəsində bizi düşünməyə vadar edən haldır. Azərbaycan vasitəçilərlə bağlı fikrini bildirir ki, onlar həqiqətən də Azərbaycan və Ermənistan arasında uzunmüddətli sülh sərhəddinin bağlanılması, sülhün təmin olunmasına xidmət edə biləcək bir fəaliyyət sərgiləmək niyyətindədilərsə, bununla bağlı onların özlərinin xüsusi strategiyası varsa və bu strategiyanın kökündə məhz Azərbaycan və Ermənistan dövlətlərinin sülh şərayitində yaşamaq üçün zəruri imkanların səfərbər olunması elementləri varsa və bu niyyət həmin strategiyanın reallaşması üçün bir prinsip olaraq əldə rəhbər tutulursa, təbii ki, belə olduğu təqdirdə vasitəçilər öz missiyasını rahat həyata keçirə bilərlər. Əgər bu missiya adı altında başqa niyyətlər güdürlərsə, burada merkantil maraqları təmin etmək istiqamətində öz fəaliyyət sərgiləyirlərsə, təbii ki, bu heç bir zaman sülh prosesinə müsbət təsir edə bilməz, əksinə onu əngəlləyir, ləngidir və gedən sülh danışıqları prosesini dalana salır".

Telegramda izləyin