"Bakı dünən və bu gün yağış ilə sözün həqiqi mənasında mübarizə apardı və məğlub oldu" - SOSİOLOQ

Payız ayıdır və havalar çox zaman yağışlı keçə bilir. Bu isə paytaxtda vəziyyəti gərginləşdirir. Bir çox ərazilərdə gediş-gəliş çətinləşir. Bakıda belə halların yaranması kanalizasiya sisteminin normal işləməməsi ilə bağlıdır. Kanalizasiya sistemləri niyə görə normal işləmir və belə hallara yol açır? Bununla bağlı hansı addımlar atılmalıdır?

Mövzu ilə bağlı Sonxeber.az-a sosioloq Lalə Mehralı danışdı.

Sosioloq sözü gedən məsələ ilə bağlı açıqlamasında qeyd etdi ki, Bakıda çox az yağışa hesablanmış kanalizasiya sistemləri qurulduğu üçün belə hallar yaranır:

"Paytaxtda bir günlük güclü yağan yağış bütün hərəkəti iflic etdi. Təsəvvür edin ki, tunellər maşınların oradan keçə bilməyəcəyi qədər su ilə dolub. Bir az əvvəl gördüm ki, universitetlərin birinin bufeti su ilə dolub. Həmin hissəyə giriş-çıxış mümkünsüzdür. Belə bir vəziyyət niyə yaranmalı və bu həddə çatmalıdır?! Bakıda demək olar ki, kanalizasiya deyilən bir sistem yox dərəcəsindədir. Çox az yağışa hesablanmış bir sistem qurulub. Dünəndən paytaxat yağan yağış fəlakət həddə deyildi. Bu normal bir haldır və çox ölkələrdə belə güclü yağış yağır. Amma bizdə belə yağış ildə bir dəfə yağdıqda ölkədə vəziyyət alt-üst olur. Nəqliyyatın iflic olması, ictimai nəqliyyatla bağlı ciddi problemlərin ortaya çıxması, yollarda hərəkətin məhdudlaşması, bir çox ərazidə tunellərin su ilə dolması və nəticədə ictimai nəqliyyatların istiqamətinin dəyişdirilməsi əhaliyə çox ciddi problemlər yaratdı. İşə gedə bilməyənlər, evinə yetişə bilməyənlər, sağlamlığı ilə bağlı ciddi problem yaşayanlar vəs. oldu. Yəni, bütün hallarda Bakı dünən və bu gün yağış ilə sözün həqiqi mənasında mübarizə apardı və məğlub oldu. Kanalizasiya sisteminin işləməməsi bir şəhər üçün ən böyük problemir. Yağış mövsümü hələ indi başlayıb və qarşıda bizi çox yağıntılar da gözləyə və ciddi təhlükələr yarana bilər. Azərbaycan böyük tədbirə ev sahibliyi edəcək və ona da saylı günlər qalıb. 193 ölkədən Azərbaycana 80 mindən çox qonaq gələcək. Təsəvvür edin Bakını necə yükü və məsuliyyət gözləyir. Həmin qonaqlar gələn ərəfədə bu cür hal yaşansa və şəhər yenə iflic vəziyyətə düşsə biabrçılıq yaşanacaq".

Vüsalə İbrahimli

Telegramda izləyin