Artan piyada ölümlərinə əsas səbəb nədir? - AÇIQLAMA

Qəza xəbərləri tez-tez gündəmi zəbt edir. Əsasən, piyada ölümü ilə nəticələnən qəzaların sayı artmaqda davam edir. Bəs, belə qəzaların çoxalmasının əsas səbəbi nədir? Bu problemin həlli yolu ilə bağlı hansı addımlar atılmalıdır?

Mövzu ilə bağlı Sonxeber.az-a nəqliyyat eksperti Elməddin Muradlı danışdı.

O,açıqlamasında bildirdi ki, əsas səbəb piyadaların yol hərəkəti qaydalarına məsuliyyətsiz yanaşmasıdır:

"Piyada ölümləri ilə bağlı narahatlıq doğuran bir çox vacib məqamlar var. Bunlardan biri piyadaların yol hərəkəti qaydalarına səhlənkar yanaşmasıdır. Digər vacib məqam piyada infrastrukturunun normal səviyyədə olmamasıdır, piyada səkilərinin zəbt edilməsi, insanların məcburən yolda hərəkət etməsidir. Digər tərəfdən vacib elementlər piyada keçidlərinin sayı, onların işıqlandırılmasıdır. Əsas səbəb piyadaların özünün yol hərəkəti qaydalarına məsuliyyətsiz yanaşmasıdır ki, bu çox ciddi problemlər yaradır. Keçid olmayan yerlərdən istifadə edirlər və ya işıqforun tələblərinə əməl etmirlər. Yaxınlıqda keçid olduğu halda ondan yararlanmırlar, diqqətsizlik edərək qəfil avtomibillərin yoluna çıxırlar. Hansı ki, piyadaların yaxınlaşmaqda olan avtomobillərin qarşısına qəflətən çıxması qanunda qadağandır. Onlar operativ nəqliyyat vasitəsinə yol verməli və işıqforun tələblərinə əməl etməlidirlər. Bu amillər piyadaların hüquq və vəzifələrini müəyyənləşdirir. Ancaq təəssüf ki, biz onların bu məsələyə səhlənkar yanaşdığının dəfələrlə şahidi olmuşuq. Bu isə çox hallarda ağır nəticələrə səbəb olur. Bu istiqamətdə nəzarət tədbirlərinin gücləndirilməsinə ciddi ehtiyacın olduğunu görürəm. Çünki, məsuliyuəti söz ilə deməklə dərk etməyən insanlar var. Belə olduğu halda nəzarət tədbirləri görülməlidir. Sürücülərə qarşı bu tədbir müxtəlif üsullarla gücləndirilib. Piyadalar da həmçinin onlar kimi məsuliyyətdən kənar qalmamalıdırlar. Bəzi hallarda onlar elə zənn edir ki, piyadalara nəzarət yoxdur, amma tam nəzarətsiz deyil. Sadaladıqlarımla paralel infrastruktura da baxmaq lazımdır. Öncə piyadalar üçün normal şərait yaradıldılmalı, sonra isə onlardan qaydalara əməl edilməsi tələb edilməlidir".

Vüsalə İbrahimli

Telegramda izləyin