"Pensiya yaşı çatmış həkimlərlə müqavilənin vaxtını uzadaraq işləyirlər" - DEPUTAT

Azərbaycanda həkimlərin əməkhaqqısı az olduğundan xaricə üz tuturlar, nəticədə kadr çatışmazlığı yaranır.

Sonxeber.az xəbər verir ki, bunu Milli Məclisin deputatı Səyyad Aran parlamentin bugünkü plenar iclasında çıxışı zamanı deyib.

O qeyd edib ki, 1200-1300 manat məvacib həkimə çatmır: "Məndə olan məlumata görə, məsələn, İmişli Mərkəzi Xəstəxanasında cəmi 30 həkim işləyir. O boyda rayonda sadəcə bir dənə psixiatr var. Bəs camaat kimin üstünə getməlidir? Pensiya yaşına çatan kimi müəllimi məktəbdən çıxarırlar, yerinə yenisini gətirirlər. Lakin pensiya yaşı çatmış həkimlərlə müqavilənin vaxtını uzadaraq işləyirlər. Çünki həkim çatışmır".
O əlavə edib ki, rayonlardan İcbari Tibbi Sığortanın vasitəsilə Bakıya xəstəxanalara gəlirlər:
"Lakin onu özəl xəstəxanaya yönləndirirlər. Bu da həkimlərin, müdiriyyətin işidir. Halbuki bərabərlik prinsipi gözlənilməlidir".

Telegramda izləyin