"Ermənistanın "yarımçıq sülh" mövqeyi bölgədə sülhə nail olmaq üçün əhatəli addımlar atmamağa meylli olduğunu göstərir" - DEPUTAT

Fransanın Ermənistandakı səfiri Olivye Dekotini Azərbaycan əleyhinə qarayaxma kampaniyasına Ermənistan-Fransa münasibətlərindən daha çox önəm verir ki, bu da Fransanın xarici siyasətinin uğursuzluğunu və beynəlxalq münasibətlərə əməl etmək qabiliyyətində olmadığını göstərir.

"Azərbaycan ərazisində işğalçılığa və separatçılığa son qoyulmasını hədəfə alan açıqlamalar, Beynəlxalq Ədalət Məhkəməsinin qərarlarına yanlış istinadlar, Ermənistanın "yarımçıq sülh" mövqeyini dəstəkləyən bəyanatlar və digər absurd yanaşmalar Fransa tərəfinin reallıqları təhrif etdiyini və bölgədə dayanıqlı, həqiqi sülhün qurulmasına maraqlı olmadığını bir daha nümayiş etdirir".

Bunu Sonxeber.az-a danışan Milli Məclisin deputatı Pərvanə Vəliyeva bildirib.

Deputat qeyd edib ki, Ermənistanın "yarımçıq sülh" mövqeyi bölgədə sülhə nail olmaq üçün tam, əhatəli addımlar atmamağa meylli olduğunu göstərir:

"Bu mövqe, xüsusən də Azərbaycanla aparılan sülh danışıqlarında açıq şəkildə hiss olunur. Ermənistan bəzən yalnız müəyyən siyasi və ya diplomatik öhdəlikləri yerinə yetirir, lakin əsas, uzunmüddətli məsələlərə dair konkret addımlar atmır və ya kompromisə getməyə meyl göstərmir.

Bu "yarımçıq sülh" yanaşması həm regional sabitliyə ziyan vurur, həm də sülh prosesini çətinləşdirir. Belə bir mövqe, sülhün əsas məqsədi olan dayanıqlı və davamlı birgə yaşayışa mane olur və Ermənistanın gerçək sülhə nail olmaqdan daha çox öz mövqeyini qorumağa yönəlmiş bir siyasət yürütdüyünü göstərir".

Telegramda izləyin