"Azərbaycan kiçik ada dövlətlərinə öz dəstəyini bundan sonra da davam etdirəcək" - DEPUTAT

"Prezident İlham Əliyev COP29 çərçivəsində noyabrın 13-də keçirilən İnkişaf etməkdə olan kiçik ada dövlətlərinin (SIDS) Sammitində çıxışı zamanı onların səsinin qlobal arenada eşidilməsi üçün bir daha öz qətiyyətli mövqeyini ortaya qoydu. Dövlətimizin başçısı müstəmləkə keçmişi olan ölkələri kiçik ada dövlətlərinə maddi və texniki dəstək göstərməyə çağırdı".

Bu sözləri Sonxeber.az-a Milli Məclisin deputatı Səbinə Salmanova deyib.

Onun sözlərinə görə, Azərbaycan kiçik ada dövlətlərinə dəstək göstərir:

"Ölkəmiz bir sıra ölkələrə təbii fəlakətlərin təsirini azaltmaqla bağlı, həmçinin su təchizatı, qida təhlükəsizliyi və mədəni irsin bərpası layihələrinə dəstək göstərib. Bundan başqa, Azərbaycanın Qoşulmama Hərəkatında dördillik sədrliyi dövründə göstərdiyi maddi və humanitar yardımlardan 80-dən çox ölkə və 20 kiçik ada dövləti faydalanıb".

Deputat söyləyib ki, dövlət başçısı neokolonializm və iqlim dəyişmələri mövzusunda səsləndirdiyi fikirlərlə ölkəmizin prinsipial mövqeyini bir daha dünyaya nümayiş etdirdi:

"Dövlət başçımız dünyaya demokratiya dərsi keçən Fransa və Niderlandın bu sahədə törətdiyi cinayətlər, pozuntular, əməllərlə bağlı tədbir iştirakçılarına geniş məlumat verdi. Bildiyiniz kimi, həmin ölkələr öz müstəmləkə ərazilərində uzun illər boyunca yüzlərlə nüvə sınaqları aparıblar və bu səbəbdən ətraf mühit ciddi şəkildə ziyan görüb. Fransa və Niderland həmin ərazilərdə torpaq və suyun kəskin dərəcədə zəhərlənməsinə, radiasiya fonunun yüksəlməsinə görə məsuliyyət daşıyırlar".

S.Salmanova xatırladıb ki, Prezident İlham Əliyevin də qeyd etdiyi kimi, Makron rejimi Yeni Kaledoniyada kanakların builki legitim etiraz aksiyasında 13 nəfərin həyatına son qoyub, 169 nəfəri yaralanıb, 1700 insan həbs edilib:

"Təəssüflər olsun ki, Fransanın dırnaqarası dəniz ərazilərində törətdiyi cinayətlər, insan hüquqlarının kütləvi surətdə və kobud şəkildə pozulması halları bəzilərini narahat etməyib. Əksinə, onlar heç nə olmamış kimi bu kimi cinayətlərə göz yumublar. Əgər elə olmasaydı, Avropa Komissiyası, Avropa Parlamenti və Avropa Şurasının Parlament Assambleyası Fransanın bu addımlarına səssiz qalmazdılar. Hesab edirəm ki, bu qurumlar da günahsız insanların qətlinə, həbsinə görə Fransa hökuməti ilə eyni məsuliyyəti daşıyırlar", - xanım deputat deyib.

Parlamentari sonda onu bildirib ki, Azərbaycan kiçik ada dövlətlərinə öz dəstəyini bundan sonra da davam etdirəcək: "Ölkəmiz həmişə ədalətin tərəfində olacaq".

Telegramda izləyin