"Rayonlarda fabrik və zavodlar açılmalıdır ki, sakinlər öz güzəranlarını təmin edə bilsinlər" - AÇIQLAMA

"İşsizlik bölgələrdə bir nömrəli problem kimi özünü göstərir" Bu sözləri Milli Məclisin deputatı Jalə Əliyeva deyib.

Bəs görəsən bölgələrdəki işsizliyin qarşısının alınması üçün hansı addımlar atılmalıdır?

Mövzu ilə bağlı sosioloq Lalə Mehralı Sonxeber.az - a açıqlama verib:

"Bölgələrdə insanlar iş yeri baxımından çox çətinlik çəkir. Bu bütün yaş kateqoriyaları üçün keçərlidir. Əkin sahəsi olan insanlar bundan gəlir əldə edə bilir, hərçənd həmin gəlir onların maddi rifahını təmin etmir. Çünki, əkindən bol məhsul ala bilmək üçün yaxşı sərmaye olmalıdır. Bu isə yoxdur. Suvarma, dərmanlama problemləri var. Düzdür dövlət bir qədər kömək edir, amma bu həmin sahələr üçün çox azdır. Ciddi şəkildə bazara çıxa bilmə məhdudiyyətləri var. Yəni məhsullar sahədə çox ucuz qiymətə satılır. Bizim Bakıdan kilosunu 2 manata aldığımız meyvə, sahədə kəndlidən 30 qəpiyə alınır. Belə olan halda təbii ki, kəndlilər əkinçiliyə maraqlı olmur, yeni iş axtarmağa başlayırlar. Nəzərə alsaq ki, rayon mərkəzlərində yaşayan, pay torpağı olmayan insanlar var - bu zaman böyük ehtiyaclar yaranır. Rayonlarda fabrik və zavodlar açılmalıdır ki, sakinlər öz güzaranlarını təmin edə bilsinlər. Burda həm kişilər, həm də qadınlar nəzərə alınmalıdır. Dövlət müəssiələri istisna olmaqla, rayonlarda başqa iş yerləri yoxdur. Bu da əhalinin neçə faizini təmin edə bilər? Belə olan halda bölgələrdəki işsiz əhali Bakıya axın edir. Bu da Bakının yükünü artmasına səbəb olur. Bölgələrdə mütləq qaydada iş yeri təminatı yaradılmalıdır. İnsanlar öz rayonlarını tərk etmək məcburiyyətində qalmamalıdırlar"

Çiçək Sadatova

Telegramda izləyin