Qanunsuz ov edən şəxslərə bu cəzalar tətbiq ediləcək - AÇIQLAMA

Azərbaycanda ov mövsümü ənənəvi olaraq hər il 1 sentyabrda açılır və fevral ayına qədər davam edir. Qaydaların sərtləşdirilməsinə və yüksək cərimələrə baxmayaraq, ölkədə qanunsuz ov hallarının sayı artmaqdadır.

Bəs görəsən qanunsuz ov edən şəxslərə hansı cəzalar tətbiq edilir?

Hüquqşünas Ramil Süleymanov Sonxeber.az – ın bu sualını cavablandırıb:

"Qanunsuz ov etmə və ov qaydalarının pozulması ilə bağlı şəxsləri Azərbaycan Respublikasının qanunvericiliyinə uyğun olaraq həm inzibati, həm cinayət məsuliyyətinə cəlb etmək mümkündür.
Belə ki, İnzibati Xətalar Məcəlləsinin 272.3 -cü maddəsinə əsasən ov qanunlarının kobud pozulması, yəni ovçuluq etməklə bağlı lazımi icazənin olmaması, qadağan olunmuş yerlərdə ovların həyata keçirilməsi, qadağan olunan alətlərlə ov etmək və o cümlədən bu qaydaların müntəzəm pozulmasına görə bu xətanın törədilməsinə birbaşa səbəb olan alət və predmetlər müsadirə edilməklə və ya edilməməklə 1000 manatdan 2000 manata qədər cərimə, yaxud da 6 aydan 2 ilə qədər ov hüququnun məhdudlaşdırılması icra olunur.
Məsələ ilə bağlı cinayət məsuliyyəti də mövcuddur. Belə ki, Azərbaycan Respublikasının Cinayət Məcəlləsinin 258.1-ci maddəsinə əsasən lazimi icazə olmadan və ya qadağan olnmuş yerlərdə, qadağan olunmuş vasitələrlə ov edərək xeyli miqdarda ziyan vurmaq 2000 manatdan 3000 manata qədər cərimə, 1 ilə qədər müddətdə islah işləri və ya 1 ilə qədər azadlığın məhdudlaşdırılması ilə cəzalandırılır.
Qeyd edim ki, xeyli miqdarda ziyan dedikdə burda 1000 manatdan 7000 manata qədər məbləğ nəzərdə tutulur. Eyni əməllər əgər külli miqdarda ziyan vurmaqla törədilərsə, yəni partlayıcı maddələrlə quşların və heyvanların ölümünə səbəb olmaqla törədilərsə 3000 manatdan 6000 manata qədər cərimə və ya 2 ilə qədər azadlıqdan məhrum etmə cəzası tətbiq olunur".

Çiçək Sadatova

Telegramda izləyin