"Ermənistan minaladığı ərazilərin xəritələrini təqdim etməyə məcbur edilməlidir" - Bəhruz Quliyev

"Azərbaycan 2020-ci ildə 44 günlük Vətən müharibəsində qazandığı parlaq qələbə nəticəsində torpaqlarını işğaldan azad etdi. Bundan sonra ölkəmiz üçün məsələnin siyasi yolla tənzimlənməsi mərhələsi başladı". 

Bunu Sonxeber.az-a danışan SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev deyib.

Bəhruz Quliyev qeyd edib ki, Vətən Müharibəsinin başa çatmasından bir neçə il keçsə də, Ermənistan minalanmış ərazilərin xəritəsini Azərbaycana təqdim etmək istəmir:

"Səbəb isə Ermənistanın bizim itkilərimizin sayının çox olmasını istəməsidir. Məlumdur ki, gün keçdikcə minaya düşərək həlak olan vətəndaşlarımızın sayı artır. Azad olunmuş əraziləri minalardan təmizləmək üçün isə uzun illər lazımdır. Postmüharibə dövründə minalanmış sahələrin xəritəsinin qarşı tərəfə təqdim edilməməsi hərb qanunlarına, eyni zamanda beynəlxalq hüquqa ziddir. Ermənistan minalanmış ərazilərinin xəritəsini təhvil verməməklə növbəti dəfə hərbi cinayət törədir.

Erməni terrorizmi beynəlxalq səviyyədə tanınır. Onlar Qarabağ­dan çıxarkən daha çox ərazini mi­nalayıblar. Artıq bununla bağlı mə­lumatlar da var. Onu da qeyd etmək lazımdır ki, bütün bu hadisələrin məsuliyyəti Ermənistan dövlətinin üzərindədir. Minalar Ermənistan­dan gətirilib, onu yerləşdirənlər er­mənilərdir. Elə bir beynəlxalq kon­vensiya yoxdur ki, Ermənistan onu pozmasın".

Deputat vurğulayıb ki, Ermənistan məqsədyönlü şəkildə bundan imtina edir:

"Azərbaycanın işğaldan azad olunmuş ərazilərində minalarla bərabər, təmizlənməsi kifayət qədər çətin olan tələlər də qurulub. Bu da minalardan təmizləmə əməliyyatına mane olur. İşğaldan azad edilmiş ərazilərin minalardan və partlamamış hərbi sursatlardan təmizlənməsi Azərbaycan hökuməti üçün prioritetdir və bərpa prosesinin vacib bir hissəsidir.

Beynəlxalq təşkilatlar minalanmış ərazilərin xəritəsini vermək üçün Ermənistana təzyiq göstərməlidir. Ermənistan minaladığı ərazilərin xəritələrini təqdim etməyə məcbur edilməlidir".

Telegramda izləyin