"ABŞ-ın ermənipərəst addımları dayanmadan gündəmə gətirdikləri demokratiya və azadlıq tezislərinə əsaslı şübhələr yaradır" - DEPUTAT

"ABŞ-ın ölkəmizdəki səfirliyinin Qərbi Azərbaycan həqiqətlərini görməzdən gəlməsi rəsmi Vaşinqtonun anti-Azərbaycan siyasətinin təzahürüdür".

Bunu Sonxeber.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib.

Deputat qeyd edib ki, ABŞ Azərbaycanın regional liderliyi fonunda Cənubi Qafqazda dəyişən geosiyasi reallıqlarla barışmaq istəmir:

"Məhz bu səbəbdən Ağ Ev admistratsiyası Ermənistanı fəal şəkildə silahlandırır və ölkəmizə qarşı növbəti hərbi qarşıdurmaya hazırlayır. Rəsmi Vaşinqtonun bu tip mövqe nümayiş etdirməsi birmənalı olaraq bölgədə sülhə və təhlükəsizliyə ciddi təhdid yaradır.

ABŞ rəsmiləri erməni lobbisinin təsiri altında hər nə qədər tarixi həqiqətləri görməzdən gəlsə də, azərbaycanlıların hal-hazırda Ermənistanın tərkibində olan əzəli torpaqlarından qovulması etnik təmizləmə və milli kimliyin məhv edilməsinin ən dəhşətli nümunələrindən biridir. Bütün tarixi faktlar, xəritələr və bölgənin toponimləri Qərbi Azərbaycan torpaqlarının məhz Azərbaycanlılara məxsus olduğunu təsdiq edir".

Deputat vurğulayıb ki, ötən müddət ərzində Ermənistan rəhbərliyi planlı şəkildə Azərbaycanlıların izlərini həmin torpaqlardan silməyə çalışsa da, buna müvəffəq ola bilməmişdir

"Çünki yurd sevgisi, vətən nisgili hər birimizin qəlbində yaşayır.Ermənistan tərəfindən soydaşlarımızın məruz qaldığı etnik təmizləmə siyasəti beynəlxalq hüququn kobud şəkildə pozulmasıdır. Bütöv bir xalqın yaşamaq hüququndan məhrum edilməsi, onların tarixi və mədəni irsinin məhvi dünya ictimaiyyəti tərəfindən qətiyyətlə pislənilməli və qarşısı alınmalıdır. Bütün beynəlxalq hüquq normaları mülki əhalinin zorla köçürülməsini qadağan edən Cenevrə konvensiyası, Ümümdünya İnsan Hüquqları Bəyannaməsi və BMT-nin deportasiya edilmiş şəxslərin geri qayıtması ilə bağlı qətnamələri Qərbi Azərbaycana qayıdış strategiyasının hüquqi bazasının olduğunu təsdiq edir.Belə olduğu təqdirdə ABŞ-ın ermənipərəst addımları dayanmadan gündəmə gətirdikləri demokratiya və azadlıq tezislərinə əsaslı şübhələr yaradır".

Telegramda izləyin