Sosial şəbəkələrdə yaxta kirayəsi fırıldağı - Tutulanlar var - Foto

Polis yaxta kirayəsi adı ilə vətəndaşları aldadan şəxsləri saxlayıb.

Sonxeber.az DİN-in Mətbuat xidmətinə istinadən xəbər verir ki, sosial şəbəkələrdə "rent.yaxta", "yaxtaların icarəsi" və digər adlar altında saxta elanlar yerləşdirməklə vətəndaşlara qarşı kütləvi dələduzluq edənlər müəyyən edilib.

Polisin keçirdiyi tədbirlərlə 23 yaşlı Nihat Azadov və tanışı 23 yaşlı Şamama Mahmudova saxlanılıblar. Onlar ayrı-ayrı şəxslərdən müxtəlif məbləğlərdə pulu hissə-hissə onlayn yolla ilkin ödəniş formasında aldıqdan sonra həmin adamları bloklayıblar.

Hər iki şəxsin əməlləri ilə bağlı Nəsimi RPİ 22-ci Polis Şöbəsində araşdırmalar davam etdirilir.

N.Azadov və Ş.Mahmudovanın qanunsuz əməllərindən zərərçəkən başqa şəxslər varsa, bu barədə polisə məlumat verə bilərlər.

Vətəndaşlara bir daha tövsiyə edilir ki, sosial şəbəkələrdə kirayə, alqı-satqı, xidmət, yaxud digər adlar altında fəaliyyət göstərən profil, səhifələrin təklifləri üzrə onlayn ödənişlərdən çəkinsinlər.

Telegramda izləyin