"Fransa İsveçrə parlamentindən istifadə edərək Azərbaycana qarşı növbəti qərəzli qətnaməsini qəbul etdirir" - Fəzail Ağamalı

"İsveçrə parlamentinin aşağı palatasında "Dağlıq Qarabağ: Sülh Konfransı" adlı qətnamə qəbul edilməsi Fransanın əl işidir".

Bunu Sonxeber.az-a danışan Ana Vətən Partiyasının (AVP) sədri, sabiq deputat Fəzail Ağamalı bildirib.

Fəzail Ağamalı bildirib ki, Fransanın İsveçrənin üzərində böyük təsiri var:

"Təsadüfi deyil ki, İsveçrənin dövlət dillərindən biri də fransız dilidir. İsveçrədə fransız dili digərlərinə nisbətən daha çox istifadə olunur. Digər məsələlərdə də Fransanın İsveçrə üzərində böyük təsiri var. Bu təsirdən istifadə edən Fransa İsveçrə parlamentindən istifadə edərək Azərbaycana qarşı növbəti qərəzli qətnaməsini qəbul etdirir. Fransa XXI əsirin üz qarası olan yeni müstəmləkə siyasətini ortaya qoyur. Bu addım bir daha Fransanın əsil simasını və anti-demokratik ölkə olduğunu ortaya qoyur. Bakı Təşəbbüs Qrupu Bakıda başlatdığı bu prosesi artıq Avropanın ortasında və Fransanın özündə bu cür eybəcərliklərə məruz qalan, hətta dilləri, adət-ənənələri sıxışdırılan və müstəmləkə rejimi altında yaşamalı olan xalqlarla birlikdə silsilə olaraq davam etdirir. Görünür, İsveçrənin qəbul etdiyi qətnamə Fransanın ölkəmizə qarşı növbəti qərəzli addımıdır. Bu qətnamələr bizi zərrə qədər narahat etmir. Çünki ermənilər Azərbaycan torpaqlarını könüllü şəkildə tərk edib, onlara heç bir təzyiq göstərilməyib. Dövlət qurumları tərəfindən hər hansı xoşagəlməz münasibət olmayıb. Bunu ermənilər azərbaycanlı jurnalistlərinə verdiyi müsahibələrdə xüsusi qeyd ediblər".

Fəzail Ağamalı vurğulayıb ki, Vətən müharibəsindən dərhal sonra Azərbaycan xüsusi portal açdı və ermənilərə müraciət etdi ki, ölkəmizin vətəndaşlığını qəbul edən ermənilər təhlükəsiz şəkildə əvvəlki kimi yaşaya bilərlər:

"Amma onlar qəbul etmədilər. Çünki 1988-ci ildə başlayan 2023-cü ilin sentyabrında keçirilən antiterror əməliyyatına qədər bu vandal xalq Azərbaycan xalqına qarşı törədilən bütün vəhşilikdə iştirak ediblər və cinayət məsuliyyəti daşıyırlar. Soydaşlarımıza qarşı misli görünməmiş vəhşiliklər törədən ermənilər Azərbaycanın qanunları çərçivəsində cavab verəcəklər. Məhz buna görə də onlar geri qayıtmadılar. Bundan istifadə edən Fransa, Niderland, İsveçrə və digər qərb dövlətləri qəbul etdiyi qərəzli qətnamələrlə Azərbaycana qarşı təzyiq göstərirlər. Bu qətnamələrin heç bir nəticəsi olmayacaq. Çünki Azərbaycan güclü dövlətdir və problemlərini öz gücünə həll etmək gücünə malikdir. Azərbaycanın əldə etdiyi qələbələri ilə dünya liderləri ilə ön sırada dayanan İlham Əliyev kimi dövlət başçısı var. Cənab prezident İlham Əliyevin xalqla sarsılmaz birliyi var. Bu cür qətnamələr heç bir gücü və hüququ olmayan kağız parçasındır. Bu gün ölkəmiz ulu öndər Heydər Əliyevin siyasətini uğurla davam etdirən cənab prezident İlham Əliyevin rəhbərliyi altında irəliyə doğru addımlamaqda və həm bəşəriyyətə, həm də Azərbaycana töhfələr verməkdədir. Bu yoldan bizi heç kim döndərə bilməz. Bizim uğurlarımız bundan sonra davam edəcək. Çünki hadisələrin gedişi Azərbaycan dövlətinin gücünü və imkanlarını bütün bəşəriyyətə nümayiş etdirməkdədir".

Telegramda izləyin