"Onlara işğaldan azad olunmuş ərazilərdə bizneslərin qurulması üçün münbit mühit barəsində məlumat vermişik" - Mürsəl Rüstəmov

"ATİB ( Azərbaycan -Türkiyə İş Adamları Birliyi) olaraq 22 ildir fəaliyyət göstəririk. Missiyamız 2 dövləti təmsil edən iş adamlarını qarşılamaq, həm Azərbaycandan olan iş adamlarının Türkiyədə bizneslərini qurmaq üçün təşviq etmək, həm də Türkiyədən Azərbaycana gələnləri isə buradakı biznes mühiti ilə tanış etməkdir".

Bu sözləri Sonxeber.az-a açıqlamasında Azərbaycan-Türkiyə İş Adamları Birliyinin İdarə Heyətinin sədri Mürsəl Rüstəmov danışıb.

O, açıqlamasında qeyd edib ki, Türkiyədən gələn iş adamlarına işğaldan azad olunmuş ərazilərdə də bizneslərin qurulması üçün münbit şəraitlə bağlı məlumat verilib:

"Sözügedən sahədə tək bu il ərzində Türkiyədən gələn 13-dən artıq dərnəyi ofisimizdə qarşılamışıq. Onlara Azərbaycanda, işğaldan azad olunmuş ərazilərdə bizneslərin qurulması üçün münbit mühit barəsində məlumat vermişik. Düşünürəm ki, tək bu il yox, gələn il də bu sahədə daha proqressiv işlər görəcəyik. Türkiyədən gələn iş adamlarımız Azərbaycana investisiya artımında əllərindən gələni edəcəklər ki, yatırım daha çox olsun. Çünki, bilirsiniz ki, qarşımızda hədəflərimiz var. İki dövlət başçısının Azərbaycan və Türkiyə arasında ticarət əlaqələrinin 15 milyarda çatmasını qarşımıza məqsəd kimi qoyubdur. ATİB-də bu istiqamətdə əlindən gələni edir və edəcək".

Vüsalə İbrahimli

Telegramda izləyin