"Tələbimiz zorla tərk etdiyimiz tarixi torpaqlara sülh və təhlükəsiz şəkildə qayıtmaqdır" - DEPUTAT

Azərbaycan Respublikasının Prezidenti İlham Əliyev "Rossiya Seqodnya" Beynəlxalq İnformasiya Agentliyinin baş direktoru Dmitri Kiselyova müsahibə verib. Müsahibə zamanı dövlət başçısı Ermənistandan qovulmuş azərbaycanlılardan da danışıb. Dövlətimizin başçısı deyib ki, Azərbaycanda Ermənistandan gələnlərin icması var, onlar 1980-ci illərin sonunda - 1990-cı illərin əvvəlində deportasiya olunmuş təxminən 300 min azərbaycanlıdır. Bu icma qayıtmaq, reinteqrasiya üçün onlara belə bir şəraitin yaradılmasına dair Ermənistan rəhbərliyinə rəsmi müraciət edib:

"Çünki onların 1990-cı illərin əvvəlində oradan deportasiyası o demək deyil ki, bu insanların qayıtmaq hüququ yoxdur. Ona görə də biz hələ bu günədək Ermənistan rəhbərliyindən azərbaycanlıların öz tarixi torpaqlarına reinteqrasiyası prosesini necə görmələri barədə cavab almamışıq".

Bununla bağlı Sonxeber.az-a danışan deputat Pərvanə Vəliyeva bildirib ki, bu gün cənab prezident İlham Əliyev Rossiya Seqodnya" Beynəlxalq İnformasiya Agentliyinin baş direktoru Dmitri Kiselyova verdiyi müsahibədə qərbi azərbaycanlılardan danışıb:

"1991-ci ildə müasir Ermənistandan 300 mindən çox azərbaycanlının zorla qovulması başa çatdı. Azərbaycanlılara qarşı etnik təmizləmə, əksər hallarda, dövlət orqanlarının sistematik səyləri ilə zorakılıq, soyqırımı aktları, kütləvi qırğınlar və insanlığa qarşı digər cinayətlər, habelə insan hüquqlarının kobud şəkildə pozulması ilə həyata keçirildi. Bu proses 1905-1906, 1918-1921, 1948-1953 və 1987-1991-ci illərdə xüsusilə dəhşətli və amansız olmuşdur. Qərbi Azərbaycan İcması Ermənistandan zorla deportasiya edilmiş 400 000-dən çox azərbaycanlı qaçqının əcdadlarının torpaqlarına qayıtmaq arzusu ətrafında birləşib: "Onların tələbi açıqdır: bu, ərazi iddiası deyil, bu, insan hüquqları məsələsidir. Tələbimiz zorla tərk edildiyimiz tarixi torpaqlara sülh şəraitində, təhlükəsizlik və ləyaqətli şəkildə qayıtmaqdır".

Telegramda izləyin