"Dövlət real infilyasiyanı nəzərə alıb, minimum əməkhaqqını 500 manata qaldırmalı idi" - AÇIQLAMA

Minimum aylıq əməkhaqqının məbləği 2025-ci il yanvarın 1-dən 400 manat müəyyən edilib. Prezident İlham Əliyev bununla bağlı Sərəncam imzalayıb.

Bəs görəsən bu artım vətəndaşları qane edəcəkmi?

Mövzu ilə bağlı sosioloq Elçin Bayramlı Sonxeber.az – a açıqlama verib:

"Bu artım infilyasiyanı indeksasiya etmir. İl ərzində real infilyasiya 50 faizə yaxındır. Baxmayaraq ki, rəsmi olaraq infilyasiya 2-3 faiz göstərilir. Bu gülünc bir rəqəmdir. Belə birşey ola bilməz. Bir il ərzində ərzaq məhsullarının qiyməti 30-70 faiz civarında bahalaşıb. Müxtəlif sahələrdə rüsumlar, vergilər, cərimələr artırılıb. Yəni faktiki olaraq əhalinin gəlirlərinin alıcılıq qabiliyyəti ortalama 50 faiz aşağı düşüb. Artım isə 10 faiz civarındadır. Bu, nəinki, artım, heç indeksasiya belə deyil. İndeksasiyanın 1/5-ni əhatə etmir. Dövlət real infilyasiyanı nəzərə alıb, minimum əməkhaqqını 500 manata, minimum pensiyanı isə 400 manata qaldırmalı idi.
Pulun nominal və real dəyəri olur. Bizdə həmişə nominal dəyər əsas götürülür. Lakin, nominal dəyərin heç bir əhəmiyyəti yoxdur, sadəcə rəqəmdən ibarətdir. Pulun real dəyəri, alıcılıq qabiliyyəti əsas götürülməlidir. Yəni, qısaca, ildən-ilə insanların aldığı maaşın rəqəmləri artsa da, o pulun alıcılıq qabiliyyəti aşağı düşür".

Qeyd edək ki, minimum aylıq əməkhaqqının məbləği 2023-cü il yanvarın 1-dən 345 manat olub.

Çiçək Sadatova

Telegramda izləyin