"Müxtəlif idman növlərində idmançılarımızın uğurları onu göstərir ki, Azərbaycan gənclərində idmana qarşı dərin sevgi var" - DEPUTAT

2024-cü il bir çox sahədə olduğu kimi idman sahəsində də bir çox parametrlərinə görə Azərbaycan üçün kifayət qədər uğurlu oldu" - bunu Sonxeber.az - açıqlama verən Azər Allahverənov deyib.

"İdman elə bir sahədir ki, burda dövlətin dəstəyinə ciddi ehtiyac var. Dövlətimizin idman sahəsinə olan dəstəyi təqdirəlaiqdir. İdman sahəsində uğur qazanmaq üçün vətənpərvərliyi özündə daşıyan bir gəncliyə ehtiyacımız var. Müstəqil Azərbaycan Respublikasında idman sahəsinə çox ciddi diqqət var. 1994-cü ildə Gənclər və İdman Nazirliyinin yaradılması, sonrakı dövrlərdə müxtəlif idman növləri üzrə federasiyaların fəaliyyət göstərməsi və.s bunun bariz nümunəsidir. Elə həmin dövrlərdən dövlətimizin idman sahəsinə olan qayğısı sonrakı dövrlərdə öz bəhrəsini verdi və bu gün də verməkdə davam edir. Düşünürəm ki, 2024-cü ildə digər dövlətlərlə müqayisədə Azərbaycan idmançılarının qazandıqları uğurlar nəticəsində ölkəmizin tarixinə daha bir şanlı səhifə əlavə olundu.

Müxtəlif idman növlərində idmançılarımızın uğurları onu göstərir ki, Azərbaycan gənclərində idmana qarşı dərin sevgi var. Hətta, məlum məsələdir ki, Azərbaycanda 44 olimpiya idman kompleksi fəaliyyət göstərir. Bununla yanaşı, işğaldan azad olunmuş ərazilərdə bərpa quruculuq işləri həyata keçirilir və bu ərazilərdə də müxtəlif idman təyinatlı komplekslərin qurulmasının da şahidi oluruq. Ağdamda "İmarət" stadionun işğal edilməsi olduqca önəmli hesab olunur. Prezidentimiz öz çıxışında bildirdi ki, bu həm də bir simvolik məna daşıyır. Füzuli şəhərində olimpiya idman kompleksinin təməli qoyulub, Suqovuşan və Köndələn çay su ambarlarında beynəlxalq avarçəkmə yarışları keçirilir. Biz bütün bunlarla işğaldan azad olunmuş ərazilərdə bura həyatın qayıtdığını dünyaya göstəririk".

Çiçək Sadatova

Telegramda izləyin