Qələbələrimizin əsasında həmrəyliyimiz dayanır

Həmrəylik günü Sovet imperiyası süqut etdikdən sonra uzun zaman bir-birinə həsrət qalan Azərbaycan xalqının birləşmək istəyinin simvoludur. Qədim və zəngin tarixə malik olan Azərbaycan xalqının dirçəlişini, tərəqqisini və milli birliyini əks etdirən, onu müstəqil dövlətçilik uğrunda müqəddəs və məsuliyyətli mübarizəyə səfərbər edən, dünya azərbaycanlılarının birliyini, milli həmrəyliyini və vətən sevgisini təcəssüm etdirən əlamətdar bayramdır.

İlk dəfə 1991-ci ilin 16 dekabr tarixində Ulu Öndər Heydər Əliyevin sədrliyi ilə Naxçıvan Muxtar Respublikası Ali Məclisində keçirilən iclasda 31 dekabrın Dünya Azərbaycanlılarının Həmrəyliyi Günü bayramı kimi qeyd olunması barədə qərar qəbul edilib. Bu qərar qəbul edildikdən sonra Ali Məclis qanunvericilik aktının qəbul olunması üçün Azərbaycan Respublikasının Ali Sovetinə müraciət edib. Dekabrın 25-də Ali Sovetin Milli Şurası müraciəti nəzərə alaraq, dekabrın 31-nin Dünya azərbaycanlılarının həmrəyliyi günü elan olunması barədə qanun qəbul edib və bütün azərbaycanlılar rəsmən bu tarixdən başlayaraq bu günü bayram kimi qeyd edir.

Ümummilli Lider Heydər Əliyev həmrəylik gününü təsis etməklə xalqımızın birləşməsinə və onun milli-ideoloji birliyinin formalaşmasına müvəffəq oldu. Bayram dünyanın 70-dən çox ölkəsində yaşayan 50 milyondan artıq azərbaycanlı ilə əlaqə qurmaq, onlar arasında birlik və həmrəylik yaratmaq işində mühüm rol oynayır. Həmrəylik gününü hətta milliyyətcə azərbaycanlı olmayıb, lakin Azərbaycanda doğulub böyümüş diaspor nümayəndələri də qeyd edirlər.
Milli birliyimizin ideoloqu Ulu Öndər Heydər Əliyevin rəhbərliyi ilə 2001-ci il noyabrın 9-10-da Bakıda Dünya Azərbaycanlılarının I Qurultayı keçirilib. Dünya Azərbaycanlılarının I Qurultayının keçirilməsi dünyanın müxtəlif ölkələrində yaşayan soydaşlarımızın daha da həmrəy olması, təşkilatlanması üçün yeni bir mərhələnin əsasını qoyub. Qurultaydan sonra Ümummilli Lider Heydər Əliyevin 2002-ci il 5 iyul tarixli Fərmanı ilə xaricdəki soydaşlarımızla əlaqələrin genişləndirilməsi və inkişaf etdirilməsi məqsədilə Xarici Ölkələrdə Yaşayan Azərbaycanlılarla İş üzrə Dövlət Komitəsinin (hazırda Diasporla İş üzrə Dövlət Komitəsi) yaradılması, həmin il dekabrın 27-də isə "Xaricdə yaşayan azərbaycanlılarla bağlı dövlət siyasəti haqqında" Qanunun qəbul edilməsi dünya azərbaycanlılarının milli birliyi və təşkilatlanması prosesini daha da gücləndirdi.

Ulu Öndərin başladığı ənənəni davam etdirən, xarici ölkələrdə yaşayan azərbaycanlılarla əlaqələrin genişləndirilməsini dövlət siyasətinin mühüm istiqamətinə çevirən Prezident İlham Əliyev mövcud sosial-iqtisadi inkişaf şəraitində diaspor quruculuğu sahəsində dövrlə səsləşən genişmiqyaslı tədbirlər həyata keçirir. 2006, 2011 və 2016-cı illərdə Bakı şəhərində, 2022-ci ildə isə Şuşa şəhərində dünya azərbaycanlılarının növbəti qurultaylarının keçirilməsi dünya azərbaycanlılarının birliyini möhkəmləndirmək, milli kimliklərini qorumaq, diaspor fəaliyyətlərini gücləndirmək üçün mühüm rol oynadı.

Dünya Azərbaycanlılarının Həmrəyliyi Günü təkcə milli birlik günü deyil, həm də Azərbaycan diasporasının gücünü, xalqımızın mədəniyyətini və dəyərlərini qoruyub saxlamağı təbliğ edən bir simvoldur. Bu bayram diasporanın milli kimliyini qorumasına və Azərbaycanla əlaqələrini möhkəmləndirməsinə töhfə verir. Dünya Azərbaycanlılarının Həmrəyliyi Günü dünya azərbaycanlılarını birləşdirən mənəvi bir körpü rolunu oynayaraq, milli dəyərlər və tarixi bağlılıqların yaşadılmasında mühüm əhəmiyyət daşıyır.

Ali Baş Komandan, Prezident İlham Əliyevin rəhbərliyi altında bir yumruq kimi birləşməyimiz, həmrəylik göstərməyimiz Vətən Müharibəsindəki böyük qələbəmiz, ərazi bütövlüyümüzü bərpa etməyimiz və suverenliyimizi tam təmin etməyimizlə nəticələndi. Qələbələrimizin əsasında həmrəyliyimiz dayanır. Azərbaycan xalqı bir daha bütün dünyaya nümayiş etdirdi ki, xalqımız böyük və müdrik xalqdır. Bundan sonra Azərbaycan xalqı müzəffər xalq kimi əbədi yaşayacaq!

Vasif Qafarov
Milli Məclisin deputatı,
Tarix elmləri doktoru

Telegramda izləyin