"Avropa Komissiyasının Prezidentinin COP29-da iştirak etməməsi Azərbaycana qarşı soyuq münasibətin nəticəsidir" - DEPUTAT

Xəbər verdiyimiz kimi Azərbaycan Respublikasının Prezidenti İlham Əliyev yanvarın 7-də yerli televiziya kanallara müsahibə verib. Müsahibə zamanı Prezident İlham Əliyev bir çox mühüm məsələlərə toxunub. Dövlət başçısı müsahibəsində Avropa Komissiyasının Prezidentinin COP29-da iştirak etməməsi ilə bağlı məsələyə də toxunub. "Bildiyimə görə, bu (COP29), Avropa Komissiyasının Prezidentinin iştirak etmədiyi ilk COP oldu. Halbuki onun iştirakı bir neçə ay əvvəl artıq təsdiq edilmişdi".

COP29-un təşkilat komitəsinin Avropa Komissiyası ilə təmas qurduğunu və qarşı tərəfə Bakıya səfər etmək üçün kifayət qədər vaxtın olduğunu bildirdiyini söyləyən Prezident İlham Əliyev diqqətə çatdırıb: "Ancaq yenə də bu mesaja Avropa Komissiyası tərəfindən əhəmiyyət verilmədi. Əlbəttə bu, COP29-un keçirilməsinə xələl gətirmədi, ancaq COP-a üzv olan tərəf kimi Avropa Komissiyasının iştirak etməməsi çoxsaylı suallar doğurur".

Bununla bağlı Sonxeber.az-a danışan deputat Pərvanə Vəliyeva bildirib ki, Avropa Komissiyasının rəhbəri Von Der Leyen COP29-da iştirakdan son anda imtina etdi:

"Lakin Aİ Komissiyası bundan öncəki COP-larda hər zaman iştirak edib və vacib rol oynayıb. Çünki Aİ iqlim maliyyələşməsində ən böyük donordur. Hətta ABŞ-dan və digər Qərb ölkələrindən belə daha çox maliyyə dəstəyi Aİ-dəndir. Həmçinin "Yaşıl Enerji"yə keçid istiqamətində Aİ aparıcı rola malikdir".

Deputat vurğulayıb ki, Avropa İttifaqında ən vacib struktur Avropa Komissiyasıdır. Bütün ciddi qərarlar Komissiya tərəfindən verilir. Avropa Komissiyası bundan öncəki COP-larda konfransa hər cürə dəstək verirdi. Amma Azərbaycana gələndə Von Der Leyen gəlməkdən imtina etdi. Bu, əlbəttə ki, siyasi səbəblərlə əlaqəlidir. Von Der Leyen qeyri-rəsmi baykot siyasətinin qurbanı oldu. O, hətta, çıxış da edəcəkdi, müvafiq panel sessiyası da olacaqdı. Düzdür, Şarl Mişel gəldi, iştirak etdi. Ancaq Şarl Mişel bu təşkilatda bir nömrəli adam deyil və nəzərə almaq lazımdır ki, o, artıq postundan getmişdi.

Bu məsələyə Avropa İttifaqı ilə münasibətlər kontekstindən baxmaq lazımdı. Bu addım onların Azərbaycana qarşı soyuq münasibətinin nəticəsidir ki, son anda xanım Leyenin COP29-da iştirakı təxirə salındı. Bununla da, Aİ məsələni siyasiləşdirdi. Eyni zamanda, Aİ öz öhdəliklərini də bu mənada yerinə yetirməmiş oldu".

Telegramda izləyin