"Azərbaycanın Ermənistan üzərində hərbi və diplomatik müstəvidə qələbə qazanması rəsmi Parisi narahat edir"- Deputat

Fransa Prezidenti Emanuel Makronun həqiqətləri təhrif edən, qərəzli və riyakar fikirlər səsləndirməsi onun anti-Azərbaycan siyasətinin göstəricisidir. 44 günlük Vətən Müharibəsi və ondan sonra yaşanan proseslər fonunda ölkəmizin Ermənistan üzərində istər hərbi, istərsə də diplomatik müstəvidə qələbələr qazanması rəsmi Parisi ciddi şəkildə narahat edir.

Fransa Ermənistandan plasdarm kimi istifadə etməklə Cənubi Qafqazda özünün dövlət maraqlarını təmin etməyə çalışır. Fransanın "erməni sevgisi"nin başlıca mahiyyəti onun anti-bəşəri niyyətlərini pərdələmək üçün bir vasitədir.

Makron Afrika başda olmaqla beynəlxalq müstəvidə yaşadığı uğursuzluqları kompensasiya etmək və yeni bir uğur hekayəsi yazmaq niyyəti ilə çabalamaqdadır.

Bu səbəbdən, Yelisey Sarayı Ermənistana hərbi dəstək verməklə revanşist meyllərin artmasına zəmin hazırlayır, regionda mövcud kövrək sülhə təhdid yaratmaqla özünün dövlət maraqlarını təmin etməyə çalışır.

Rəsmi Paris Keçmiş Minsk üçlüyünün həmsədri kimi heç vaxt Ermənistanın dövlət səviyyəsində həyata keçirdiyi cinayətlərə, soyqrımlara hüquqi qiymət verməyib. Üçlüyün davranışları beynəlxalq hüquq normalarına, hər addımda önə çəkdikləri demokratik, humanist dəyərlərə ziddir. BMT-nin məlum dörd qətnaməsi Ermənistanın işğalçı ölkə olduğunu təsdiq edir və bunlar inkar olunmaz faktlardır. Azərbaycan beynəlxalq hüquq normaları çərçivəsində yüksək hərbi-siyasi peşəkarlıq nümunəsi sərgiləyərək ərazi bütövlüyünü və suverenliyini təmin etmişdir. Aparılan hərbi əməliyyatlar zamanı bir nəfər belə mülki erməni xəsarət almamışdır. Ona görə də, Emanuel Makronun əsassız və qəbuledilməz sayıqlamaları Azərbaycana qarşı iftira və böhtandan başqa bir şey deyil.

Günay Ağamalı

Milli Məclisin deputatı, Ana Vətən Partiyasının sədr müavini

Telegramda izləyin