"ALİ TƏHSİLLİ QIZIMA XADİMƏ İŞİ TƏKLİF OLUNUR" – Yevlax sakini Dövlət Məşğulluq Agentliyindən şikayətçidir

Yevlax rayon sakini Yusibov Sadiq Binnət oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, qızı 2010-2018-ci illərdə Mingəçevir Dövlət Universitetinin həm bakalavr, həm də magistr pilləsini fərqlənmə diplomu ilə bitirsə də, indiyədək iş tapa bilmir:

"Mən, Yusibov Sadiq Binnət oğlu, yazaraq bildirirəm ki, bir çoxları kimi, işsizlik mənim də böyük problemlərimdən biridir. Qeyd edim ki, qızım 2010-2018-ci illərdə Mingəçevir Dövlət Universitetinin həm bakalavr, həm də magistr pilləsini fərqlənmə diplomu ilə bitirmiş və oxuduğu illərdə H.Əliyev təqaüdünə layiq görülmüşdür. Hətta Dövlət qulluğuna qəbul imtahanından da müvəffəqiyyətlə keçərək, sertifikat almışdır. Lakin qızım bu günə qədərdə işsizdir. Ailəlidir, 1 uşağı da var. Hazırda Qəbələ şəhərində kirayədə yaşayırlar.

Kütləvi informasiya vasitələri mütəmadi olaraq gənclərə Dövlət qayğısından ağızdolusu danışırlar. Bir Azərbaycan vətəndaşı olaraq, rəsmi qurumlara sual ünvanlayıram: mənim övladım daha hansı nailiyyətlər əldə etməlidir ki, bu qayğıdan yararlana bilsin.

Hazırda oxuyan da işsizdir, oxumayan da. Məşğulluq Agentliyindən isə xadimə işi təklif olunur. Bu da bizim çətinliyimizdir.

İş təcrübəsinin olması üçün hansısa qurum gənclərə şans verməlidir. Əgər səhvəmsə bildirin, mən də səhvimi başa düşüm.

Ölkədə işsizlik baş alıb gedir. Oxumuş da xadimə işinə dəvət olunsun, oxumamış adam da. Bu, nə qədər doğru bir addımdır? Xahiş edirəm, işə götürənlər belə savadlı kadrlara şans versin"./Hurriyyet.az

Telegramda izləyin