"Ermənistan cənab Prezident İlham Əliyevin növbəti xəbərdarlığından nəticə çıxarmalıdır" - DEPUTAT

"Yanvarın 7-də Cənab Prezident İlham Əliyev yerli televiziya kanallarına verdiyi müsahibəsində bir çox mühüm məsələlərə toxundu".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, müsahibədə ictimaiyyəti maraqlandıran bir çox məqamlara aydınlıq gətirən dövlətimizin başçısı Azərbaycanın bütün sahələrdə qazandığı nailiyyətlər, icra olunan layihələr haqqında da geniş əhatəli məlumat verdi:

"Bununla yanaşı, cənab prezident İlham Əliyev qarşıdan duran hədəflər barədə də ölkə ictimaiyyəti məlumatlandırdı.
Həmçinin, Ali Baş Komandan növbəti dəfə Ermənistan və onun havadarlarına xəbərdarlıq etdi. Müsahibədə dövlət başçımız regionda sülhün və təhlükəsizliyin təmin olunması ilə bağlı dövlətimizin dəyişməz mövqedə olduğunu bir daha bildirdi. Ermənistan cənab prezident İlham Əliyevin xəbərdarlığından nəticə çıxarmalıdır. Ermənistan rəhbərliyi ağlını başına yığmalı, Azərbaycanın tələblərini yerinə yetirməli və qısa müddət ərzində sülh müqaviləsini imzalamalıdır. Əks təqdirdə regionda yenidən müharibənin başlanması ilə bağlı bütün məsuliyyət Ermənistanın üzərinə düşəcək. Prezident İlham Əliyevin də söylədiyi kimi,"biz, sadəcə olaraq, müşahidəçi kimi buna tamaşa edəsi deyilik". Necə ki, torpaqlarımızın işğalı ilə barışmadığımız kimi".

Deputat vurğulayıb ki, cənab Prezident İlham Əliyev müsahibəsində qərbi azərbaycanlıların qayıdışı öz dədə-baba yurdlarına qayıdışı məsələsinə toxunub:

"Öz doğma torpaqlarından zorla çıxarılmış qərbi azərbaycanlıların hüquqları bərpa olunmalı, Ermənistan soydaşlarımızın geri dönməsi ilə bağlı yaratdığı süni əngəllərə son qoymalıdır. Ermənistan İnsan Hüquqlarının Ümumdünya Bəyannaməsində, Vətəndaş və Siyasi Hüquqlar haqqında Beynəlxalq Paktda öz əksini tapmış "geri qayıtma hüququ"nu tezliklə tanımalıdır".

Deputat söyləyib ki, cənab Prezident İlham Əliyev dünənki müsahibəsində 2025-ci ildə Qarabağ və Şərqi Zəngəzurda həyata keçiriləcək layihələr barədə də geniş məlumat verdi:

"2025-ci ildə də işğaldan azad edilmiş ərazilərdə tikinti-bərpa işlərinin sürətləndiriməsi prioritet vəzifə kimi dövlətimizin diqqət mərkəzində saxlanılacaq. Bu məqsədlə cari ildə ən azı 4 milyard manat ayrılacaq. Keçmiş köçkünlərin öz doğma torpaqlarına köçürülməsi prosesi 2025-ci ildə də davam etdiriləcək. Hazırda həmin şəhər və kəndlərdə inşaat işləri gedir, layihələr icra olunur. Azad edilmiş ərazilərdə əsas infrastruktur layihələri yaxın zamanlarda yekunlaşması gözlənilir. Bunu cənab Prezident İlham Əliyev yanvarın 7-də yerli televiziya kanallarına verdiyi müsahibəsində də qeyd etdi. Cənab Prezident İlham Əliyevin yanvarın 7-də yerli televiziya kanallarına verdiyi müsahibəni həm də 2025-ci ildə Azərbaycanın qarşıya qoyduğu bir çox hədəflərə çatacağının anonsu kimi də dəyərləndirmək olar".

Telegramda izləyin