Həkimlər niyə rayon xəstəxanalarında işləmək istəmir? - ARAŞDIRMA

Bu gün Azərbaycanda həkimlərin təxminən 70 faizi Bakıda fəaliyyət göstərir. Bölgələrdə yaşayan vətəndaşlar tez-tez rayon xəstəxanalarında həkim qıtlığından şikayət edirlər.

Bəs görəsən həkimlər niyə rayon xəstəxanalarında işləməkdən boyun qaçırırlar?

Mövzu ilə bağlı sosioloq Lalə Mehralı Sonxeber.az – a açıqlama verib:

"Bakıda işləmək üçün imkanlar daha əlverişli, pasiyent bazası daha genişdir deyə həkimlərin əksəriyyəti Bakıda işləməyə üz tutur. Çünki, başqa sahələrdən də məlum olduğu kimi bölgələrdə iş imkanları çox məhduddur. Rayonlarda insanların ciddi işsizlik və gəlir problemi var. Niyə ölkənin əksər rayonlarında insanlar öz evlərini qoyub Bakıya üz tuturlar? Çünki iş yoxdur. İş olmayanda da gəlir olmur. Gəlir olmasa həkimə necə getmək olar? Əgər gəlir təmin olunmazsa, deməli həkim də olmayacaq, müəllim də və.s. Bütün bunları nəzər alsaq, həkimlərin paytaxtda cəmləşməsinin səbəbi bölgələrdə əhalinin seyrək məskunlaşması və gəlir səviyyələrinin aşağı olmasıdır. Paytaxtda isə daha geniş imkanlar var. Həm şərait, həm də pasiyent baxımından. Ölkə əhalisi kompakt olaraq harda məskunlaşıbsa, peşələrin icrası da orda reallaşır. Bütün peşə sahibləri həmin kompakt ərazini seçir öz fəaliyyəti ilə məşğul olmaq üçün. Həkimlərin bölgələrə getməsi üçün bu, onlara həm gəlir, həm də şərait cəhətdən maraqlı olmalıdır. Amma bölgələrdə belə alternativlər yoxdur deyə həkimlər də normal olaraq bakıda işləməyi seçir".

Tibbi ekspert Adil Qeybulla hesab edir ki, bunun səbəbi Bakıda həyat şərtlərinin daha rahat olmasıdır:

"Həkimlər ona görə Bakıda işləyir ki, burda onların şəraitləri nisbətən daha yaxşıdır. Əmək haqqı, gəlir, sosial imkanlar və.s faktorlar rayonlarda ürəkaçan deyil. O cümlədən jurnalistlər, hüquqşünaslar və.s də getmir rayonlara işləməyə. Bunun səbəbi şəraitdir. Həkimin rayonda işləməsi üçün onun sosial durumu elə olmalıdır ki, işə stimulyasiyası olsun. Bu işlər hər hansı mənəvi prinsiplə tənzimlənə bilməz".

Çiçək Sadatova

Telegramda izləyin