"Xırdalanda hərəkətin təşkili ilə bağlı müəyyən layihələr nəzərdə tutulur" - NƏQLİYYAT EKSPERTİ

"Metro stansiyalarının təxmini xəritəsi ortaya çıxıb. Bu tam dəqiq olmasa da, təxmini bilinən odur ki, "Xətai" metro stansiyasının davamı kimi Ağ Şəhərdə yeni stansiya tikilə bilər. Bənövşəyi xətt üzrə və ola bilsin sarı xətt üzrə yeni stasiyalar da tikilsin. Ümumilikdə, birinci mərhələdə Cənab Prezidentin də qeyd etdiyi kimi 10 stansiyanın tikilməsi nəzərdə tutulur. Bakının baş planı ötən il təsdiqləndi və orada da qeyd olunmuşdur ki, 2040-cı ilə qədər əlavə olaraq 20-dən çox stansiya tikilməlidir".

Bunu Sonxeber.az-a nəqliyyat eksperti Elməddin Muradlı danışıb.

O, açıqlamasında qeyd edib ki, Səbail, Qaradağ və Lökbatan istiqamətlərinə metro stansiyaların çəkilməsi arzuolunandır:

"Yəqin ki, bu 3 mərhələdə həyata keçiriləcək. Birinci mərhlədə 10, ikinci mərhələdə yenə 10 stansiya, sonra əlavə 10 yaxın əlavə stansiyanın tikitisi nəzərdə tutulur. Ümumilikdə Bakı şəhərində bu gün təxminən 57-60 stansiya lazımdır. Aparılan təhlillər onu göstərir. Bundan əlavə, Cənab Prezident onu da qeyd etdi ki, metro ilə avtobusları əlaqələndirmək lazımdır. Yəni, harada metro tikilirsə, ora avtobus marşurutu çəkilməlidir. Vətəndaşlar avtobuslar vasitəsi ilə metroya gəlməli, metrodan çıxdıqdan isə yenə avtobusdan istifadə edə bilməlidir. Yəni, bu iş bir-biri ilə əlaqəli şəkildə qurulmalıdır. Burada aidiyyatı qurumların üzərinə daha böyük məsuliyyət düşür. Metro stansiyaları tikilərkən, bu layihələr artıq əvvəlcədən razılaşdırılmalı, dəyərləndirilməlidir ki, sonradan avtobusla bağlı problemlər yaranmasın. "Xocaəsən" stansiyasında bu problem yaşanmışdı. Ora açıldı və üzərindən xeyli müddət keçdikdən sonra oraya marşurut xətti çəkdilər. Hansı ki, bu belə olmalı deyildi, stansiya açılan kimi orada avtobuslar da fəaliyyət göstərməli idi. Ümumilikdə Suraxanı, Sabunçu ərazilərinə də yeni metro stansiyalarının çəkilməsi nəzərdə tutulur. Mən çox istərdim ki, Səbail, Qaradağ, Lökbatan istiqaməti də metro stansiyalarla təmin edilsin. Çünki, orada kütləvi yaşayış mövcuddur və daha da çoxaldığı üçün vacibdir. Xəzər, Binə, Qala, Xırdalan ərazilərində də yaranması arzuolunandır. Ancaq, Xırdalanda hərəkətin təşkili ilə bağlı müəyyən layihələr nəzərdə tutulur, ola bilsin ki, orada heç metro stansiyaya ehtiyac qalmaz. Amma hər halda olması önəmlidir. Çünki, metro ictimai nəqliyyatın ən rahat, təhülkəsiz bir formasıdır və nə qədər çox olsa, o qədər faydalıdır".

Vüsalə İbrahimli

Telegramda izləyin