KTMT-dən çıxdığı halda Ermənistanı hansı aqibət gözləyir? - ŞƏRH

"ABŞ ilə Ermənistan arasında strateji tərəfdaşlıq haqqında sazişin imzalanması İrəvan və Vaşinqton arasında münasibətləri keyfiyyətcə yeni müstəviyə qaldırır. Bundan əvvəl də strateji dialoq yönündə iki dövlət arasında hüquqi sənəd imzalanmışdı, lakin belə görünür ki, demokratların hakimiyyətlərinin son günlərində belə bir sənədi imzalaması həm də Bayden administrasiyasının sorosçulara olan son dəstəyi kimi də anlaşılır".

Bunu Oxu.Az-a açıqlamasında siyasi şərhçi İlyas Hüseynov deyib.

O bildirib ki, bundan sonra ABŞ tərəfindən Rusiyanın inteqrasiya platformasına qarşı müəyyən demarşlar ola bilər:

"Bəs bu, hansı formada özünü göstərə bilər? Ermənistan Kollektiv Təhlükəsiz Müqaviləsi Təşkilatı və Müstəqil Dövlətlər Birliyindən çıxa bilər, Rusiya sərhədçilərinin isə bütün Ermənistan ərazisində yerləşməsi sona çatar, nəticədə Rusiya Federal Təhlükəsizlik Xidmətinin sərhəd qoşunları Ermənistan ərazisini tərk edər. Eyni zamanda, Gümrüdəki 102-ci hərbi bazanın fəaliyyətinə də xitam verilə bilər və s. Yəni bütün bunlar İrəvanın istəkləri ilə yanaşı, Qərb tərəfindən də tələb olunan şərtlər kimi nəzərdən keçirilir".

"Bunun ardınca, əlbəttə ki, Ermənistan təhlükəsizlik zəmanətləri kontekstində Kollektiv Təhlükəsizlik Müqaviləsi Təşkilatının yerini başqa bir hərbi inteqrasiya ilə doldurmaq məqsədləri güdür. Bu, yavaş-yavaş Ermənistanın NATO-ya üzvlüyünü formalaşdıra və Avropa İttifaqına gedən yolunu aça bilər. Nəhayət, KTMT-dən çıxmaq həm də Moskva ilə İrəvan arasında münasibətlərin daha da gərginləşməsinə, soyuq münasibətlərin daha çətin müstəviyə yönəlməsinə gətirib çıxaracaq. Bu da şübhəsiz ki, Cənubi Qafqazda vəziyyəti daha da turbulentləşdirə bilər. Eyni zamanda, nəzərə almaq lazımdır ki, ABŞ hansı dövlətlə bu cür sənəd imzalayıbsa, bu, daha sonra geosiyasi kollapsa yol açıb".

Telegramda izləyin