"Bu gün AŞPA öz missiyasını unudaraq dövlətlərin milli maraqlarına hörmət qoymadan öz istək və arzularını sırımağa çalışır" - DEPUTAT

Xəbər verdiyimiz kimi Gürcüstan hakimiyyəti AŞPA-dakı nümayəndə heyətinin üzvlərini geri çağırdı.

Bununla bağlı Sonxeber.az-a danışan deputat Cavanşir Paşazadə bildirib ki, Azərbaycan AŞPA ilə əməkdaşlığı bir öncə dayandırıb:

"Gürcüstanın da belə bir qərar verməsi Azərbaycanın bir il öncə qərarın ədalətli olduğu bu gün bir daha təsdiqlədi. Təəssüf ki, bu gün AŞPA öz missiyasını unudaraq dövlətlətlərin milli maraqlarına, suverenliyinə, ənənələrinə heç bir hörmət qoymadan özünün istək və arzularını, prinsiplərini qeyd-şərtsiz sırımağa çalışır. Təbii ki, bu da haqlı üzv dövlətlərin maraqlarına cavab vermir və narazılıq doğurur. Avropa Şurasının Parlament Assambleyası (AŞPA) hər zaman Azərbaycana qarşı qərəzli mövqe göstərib. Belə olan təqdirdə də Azərbaycan Avropa Şurası Parlament Assambleyası (AŞPA) kimi qeyri-ciddi və qərəzli təşkilatla əməkdaşlığı davam etdirə bilməzdi. Məhz ona görə də bir öncə Azərbaycan AŞPA əməkdaşlığı dayandırdı. Bu gün Azərbaycan müstəqil, suveren, demokratik dövlət kimi dünyada nüfuz sahibinə çevrilib.Bu bir il ərzində AŞPA ilə əməkdaşlığın dayandırılması və qurumun Azərbaycana qarşı qərəzli ittihamları ölkəmizin imicinə təsir etməyib. Əminəm ki, bundan sonra da edə bilməyəcək. Çünki Avropa Şurası Parlament Assambleyasının ölkəmizin əlehinə qəbul etdiyi qətnamələr kağız parçasından başqa bir şey deyil".

Deputat vurğulayıb ki, hər zaman qərbdəki anti-Azərbaycan qüvvələr bu təşkilatdan ölkəmizə qarşı təzyiq vasitəsi kimi istifadə ediblər:

"Bu gün də eyni siyasət yürüdülür. Azərbaycanın ərazi bütövlüyünü və suverenliyini bərpa etməsini həzm edə bilməyənlər ölkəmizə qarşı açıq-aşkar qarayaxma kampaniyasına başlayıblar. 44 günlük Vətən müharibəsində əldə etdiyimiz möhtəşəm zəfərdən və lokal antiterror əməliyyatlarında Azərbaycan suverenliyini tam təmin etdikdən sonra ölkəmizə qarşı qarayaxma kampaniyalar daha da şiddətlənib. Qərbin bu planları bu günə baş tutmayıb, heç vaxt da baş tutmayacaq".

Telegramda izləyin