"Avropa İttifaqı saxta demokratiya şüarları altında hər zaman öz iradəsini diqtə etməyə çalışır" - DEPUTAT

Gürcüstan nümayəndə heyətinin Avropa Şurasının Parlament Assambleyasında iştirakını dayandırması rəsmi Tiflisin prinsipial və qətiyyətli mövqeyinin təzahürüdür.

Avropa İttifaqı saxta demokratiya şüarları altında hər zaman öz iradəsini diqtə etməyə çalışır. Onlar ölkələrin daxili işlərinə müdaxilə edir, reallıqları görməzdən gələrək prosesləri istədikləri kimi fərqli kontekstdə təqdim edirlər.

Lakin Gürcüstan hakimiyyəti və baş nazir İrakli Kobaxidze bir daha Brüsselin diqtəsinə boyun əymək niyyətində olmadığını hər kəsə nümayiş etdirdi. Bu qəti və nümayişkaranə addım Avropaya ciddi bir ultimatumdur.

Biz uzun müddətdir Azərbaycan və Ermənistan münasibətləri fonunda Avropa Şurasının mahiyyətini və xoş olmayan məramını çox yaxşı bilirik. Ancaq Gürcüstanda keçirilən son parlament seçkilərindən sonra Avropa təşkilatlarının əsl siması bir daha hər kəsə məlum oldu.

Hakim "Gürcü arzusu" Partiyasının balanslaşdırılmış xarici siyasət strategiyası həyata keçirməyə başlaması Brüsselin regional maraqlarına uyğun gəlmədi. Çünki, Avropa siyasi dairələri Gürcüstandan öz maraqları kontekstində plasdarm kimi istifadə etməyə çalışırlar. Bu isə bütün hallarda bölgədə mövcud siyasi sabitliyə xələl gətirir.

Günay Ağamalı

Milli Məclisin deputatı, Ana Vətən Partiyasının sədr müavini

Telegramda izləyin