"Dövlət tərəfindən müəllimlər üçün xüsusi yaşayış binalarının inşa edilməsi daha keyfiyyətli tədrisə töhfə verər" - DEPUTAT

Bu gün müzakirə olunan məsələlərdən biri də müəllimlərin mənzil şəraitinin yaxşılaşdırılmasıdır. Səsləndirilən təkliflərdən biri də müəllimlərin kirayə pullarının bir hissəsinin dövlət tərəfindən ödənilməsidir.

Bununla bağlı Sonxeber.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib ki, müəllimlik cəmiyyətin ən şərəfli və vacib peşələrindən biridir:

"Gələcək nəsilləri yetişdirən müəllimlərimizin sosial rifahı onların iş keyfiyyətinə və təhsilin ümumi səviyyəsinə təsir edir.

Ölkəmizdə bəzi dövlət qurumlarında çalışan əməkdaşlar üçün kirayə pulu dövlət tərəfindən ödənilir. Xüsusilə hərbi qulluqçular, hüquq-mühafizə orqanlarının əməkdaşları və bəzi strateji dövlət qurumlarının işçiləri bu imkandan faydalanırlar.

Yaşayış yerindən uzaq məsafədə işləyən müəllimlərə kommunal xidmətləri və yaşayış yerinin kirayə haqqını ödəmək üçün dövlət tərəfindən kompensasiya ödənilir, əməkhaqları isə digər müəllimlərlə müqayisədə daha yüksəkdir. Dövlət tərəfindən dəstəyin göstərilməsi xüsusilə bölgələrdə müəllim çatışmazlığının qarşısını alır.

Müəllimlər üçün güzəştli ipoteka proqramlarının genişləndirilməsi, gələcəkdə bölgələrdə dövlət tərəfindən müəllimlər üçün xüsusi yaşayış binalarının inşa edilməsi onların motivasiyasını artırar və daha keyfiyyətli tədrisə töhfə verər".

Telegramda izləyin