"Ərəb baharı" və ayrı-ayrı ölkələrdə baş verən "rəngli inqilab"ların hər birində USAİD-in "barmağı" var" - DEPUTAT

"ABŞ Beynəlxalq İnkişaf Agentliyi (USAID) haqqında müstəqil siyasət yürüdən ölkə olaraq Azərbaycan zamanında Vaşinqton rəsmilərinə kifayət qədər tutarlı mesajlar göndərmişdi. Amma USAİD-in çirkli fəaliyyətini durdurmağı ABŞ-da kimsə düşünmürdü".

Bu fikirləri Sonxeber.az-a açıqlamasında SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev deyib.

Bəhruz Quliyev qeyd edib ki, USAID Amerika Birləşmiş Ştatları hökumətinin müstəqil agentliyidir, əsasən mülki xarici yardım və inkişaf köməyin idarə edilməsinə cavabdehdir:

"Amma bu yardımları, cəmiyyətlərin inkişafını necə inkişaf etdirir, bu, çox maraqlıdır. İndiyədək ABŞ-ın rəsmi mənbələri USAİD-i başqa cür təqdim etməyə çalışıblar, bəs bu təşkilatın əsl üzü necədir? Yardım adı altında hansı ölkələrdə qanunsuz əməllər törətdiyini sadalamaqla qurtarmaz. "Ərəb baharı"ndan tutmuş ayrı-ayrı ölkələrdə baş verən "rəngli inqilab"lara qədər, hamısının altından USAİD-in "barmağı" çıxıb. Əslində bu təşkilatın müxtəlif adlar altında dünya ölkələrində törətdiklərinin ABŞ-ın imicinə nə qədər ziyan vurduğu barədə əvvəllər də xəbərdarlıqlar edilmişdi. Buna baxmayaraq nə Ağ Ev, nə Konqres, nə də Senat təşkilatın əməlləri ilə dövlətin siyasətində bir bağlılıq, uyğunluq olduğunu nəzərə alaraq, əksinə ona dəstək verilmişdir".

Bəhruz Quliyev vurğulayıb ki, bu gün isə Ağ Evdə tam fərqli bir prezident və komandası fəaliyyət göstərir. Trampın siyasətində "öncə Amerika", "hər şey Amerika üçün" şüarı prioritetdir:

"Yeni hökumət xarici ölkələrə və oradakı layihələrə milyardlar xərcləmək niyyətində olmadığını açıqlayıb. Bu gün Trampın bir nömrəli vəzifəsi ABŞ-ı xilas etməkdir. Ona görə də son 20 ildə Yaxın Şərq, Cənubi Qafqaz, postsovet məkanı, "qara qitə" və digər regionlarda baş tutan inqilabları, dövlət əlehinə aksiyaları, pozuculuq ssenarisi üzərində tərtib edilmiş layihələri maliyyələşdirən USAİD kimi təşkilatların fəaliyyətini dondurmaq da planın bir hissəsidir. ABŞ-ın indiki hakimiyyətinin reaksiyası belədir ki, İlon Maskın rəhbərlik etdiyi ABŞ Hökumətinin Səmərəliliyi Departamenti USAID-ə nəzarət etməyə başlayıb. Texnologiya maqnatı və Trampın müttəfiqi İlon Mask ABŞ Beynəlxalq İnkişaf Agentliyinin "ölməsinin" vaxtının gəldiyini söyləyib. Məsələ burasındadır ki, Ağ Ev administrasiyasının araşdırmasından sonar məlum olub ki, USAID tərəfindən idarə olunan maliyyənin yalnız 10-30 faizi yardıma gedir. Təşkilat "bir dəstə dəli radikallar" tərəfindən idarə edilib, "Amerikaya nifrət edən radikal solçu marksistlərin gürzə yuvası"na çevrilib. Bu fikirləri İlon Mask da təsdiq edib.

USAİD-in Azərbaycanda fəaliyyətinin "humanitar pərdə" altında olduğunu hər kəs bilir. Media və QHT-lər üzərindən cəmiyyətin "inkişafına" hansı "töhfələr" verdiyindən də xəbərdarıq. Bir faktı qeyd edək, bu ilin yanvar ayının əvvəllərində Azərbaycan XİN belə bir məlumat yaydı ki, ABŞ ən yüksək səviyyədə USAİD çərçivəsində əməkdaşlığın davam etdirilməsi barədə mesajlar göndərib. Azərbaycan da qarşı tərəfə şərtlərlə bağlı danışıqların aparılmasının vacibliyini bildirdikdə məlum oldu ki, ABŞ öz istəyini Azərbaycana diktə edərək qəbul etdirmək istəyir. Azərbaycanın heç bir legitim maraqlarını nəzərə almaq istəmir. Belə olan təqdirdə Azərbaycan həmin sazişin bir daha uzadılmaması barədə qərar qəbul etdi".

Telegramda izləyin