Bakıda piyadaların vurulmasının ANBAAN GÖRÜNTÜLƏRİ

"Son zamanlar piyadavurma hallarının təhlili qəzaların əsasən piyadaların yolu müəyyən olunmayan yerlərdən keçmələri, nəqliyyat vasitələrinin önündən anidən yola çıxmaları, yolu keçərkən yola baxmamaları və sair bu kimi hallar səbəbindən baş verdiyini göstərir".

Sonxeber.az xəbər verir ki, bu barədə Baş Dövlət Yol Polisi İdarəsinin (BDYPİ) müraciətində bildirilib.

Müraciətdə deyilir:

"Dəfələrlə xəbərdar edilməsinə baxmayaraq, yenə də bəzi piyadalar öz həyatlarına biganə yanaşaraq yol hərəkəti qaydalarını kobud formada pozur, nəticədə həyatlarını itirirlər.

Baş Dövlət Yol Polisi İdarəsi bir daha həyati əhəmiyyətli təhlükəsizlik qaydalarını piyadaların və sürücülərin diqqətinə çatdırır.

Piyadalar Üçün Təhlükəsizlik Qaydaları

* Yolu yalnız müəyyən olunmuş yerlərdən keçin - Piyada keçidləri, yeraltı və ya yerüstü keçidlərdən istifadə edin.

* İşıqforun siqnallarına riayət edin - Yalnız yaşıl işıqda yolu keçin. Qırmızı işıqda dayanmaq vacibdir.

* Göz təması qurun - Sürücünün sizi gördüyünə əmin olun.

* Telefon və qulaqcıqlardan istifadə etməyin - Yolu keçərkən diqqətiniz dağılmamalıdır.

* Gecə vaxtı reflektorlu və ya açıq rəngli geyim geyinin - Bu, sürücülərin sizi daha yaxşı görməsinə kömək edər.

* Dayanmış avtomobilin qarşısından yolu keçməyin - Bu, digər sürücülərin sizi görməməsinə səbəb ola bilər.

* Qaçaraq və ya ani hərəkətlə yolu keçməyin - Sürücülər sizin hərəkətinizi əvvəlcədən görməli və reaksiya verməyə vaxt tapmalıdırlar.

Sürücülər üçün Təhlükəsizlik Qaydaları:

* Piyada keçidlərinə yaxınlaşarkən sürəti azaldın - Piyadalara yol verməyə hazır olun.

* İşıqforlara və yol nişanlarına əməl edin - Xüsusilə məktəb və xəstəxana yaxınlığında daha diqqətli olun.

* Yağışlı və qarlı havada ehtiyatlı sürün - Yol sürüşkən ola bilər və əyləc məsafəsi uzana bilər.

* Piyadaları gözləyin və göz təması qurun - Əmin olun ki, piyada sizin maşını dayandırdığınızı anlayır.

* Telefon və digər yayındırıcı vasitələrdən istifadə etməyin - Sürərkən diqqətiniz tam yolda olmalıdır.

* Alkoqollu içkilərdən sonra sükan arxasına keçməyin - Bu, həm sizin, həm də digər hərəkət iştirakçılarının həyatı üçün təhlükəlidir.

* Uşaqlı və yaşlı piyadalara xüsusi diqqət ayırın - Onlar daha ləng hərəkət edə bilər və təhlükəni vaxtında fərq etməyə bilər.

* Maksimum sürət həddini aşmayın - Sürət həddi piyadaların və digər nəqliyyat vasitələrinin təhlükəsizliyini qorumaq üçün müəyyən edilib.

Bu qaydalara riayət etməklə yollarda təhlükəsizliyi təmin etmək mümkündür".

Telegramda izləyin