İnsanlar niyə özünü "şəfaçı", "yaşam koçu" adlandıran şəxslərə inanır? - AÇIQLAMA

Son zamanlar sosial şəbəkələrdə özlərini şəfaçı, yaşam koçu adlandıran insanlar tez-tez qarşımıza çıxır. Hansı ki, bu şəxslər insanlara ödənişlə "seans" verirlər. Bu sahədə heç bir təhsilləri olmasa belə...

Psixoloq Aytən Ələkbərova Sonxeber.az -a açıqlamasında bildirib ki, son zamanlar insanların özlərini "şəfaçı", "yaşam koçu" adlandıran bir qisim şəxslərin yaratdığı psixoloji problemlər səbəbi ilə psixoloqlara müraciət etmə hallarının sayı artıb.

Bəs görəsən niyə insanlar israrla bu şəxslərə inanmağa davam edir?

Sosioloq Lalə Mehralı bu barədə saytımıza açıqlama verib:

"Hazırda elə bir zamanda yaşayırıq ki, insanların hamısı ən asan yolla varlanmağı hədəfləyirlər. Hər gün yeni bir peşə, istiqamət məşhurlaşır. İnsanlar durmadan bu tip yeni "işlər" yaradırlar. Maraqlısı budur ki, hər birinə də təlabat yaranır. Bu insanların belə tez və asan varlanması onu göstərir ki, insanlar onlara inanır, etibar edir. Bir insan niyə öz həyatını planlamağı ondan tamamilə xəbərsiz, yad birinə həvalə etsin? Məsələ budur. Mənim həyatımı məndən yaxşı heç kəs planlaya bilməz. Əgər bu həyatı mən yaşayıramsa, deməli hərşeyin ən yaxşısını da mən özüm edə bilərəm. Çünki, gəlirlərimi, çıxarlarımı bilirəm. Həyatımda əhəmiyyətli olan və olmayan hadisələri ən yaxşı özüm anlayıram. Nəinki hər hansı bir "yaşam koçu" və ya "şəfaçı"..
Ümumiyyətlə o insanların seans vermələri, marafonlar təşkil etmələri çox absurddur. Onların gündə bir dəfə deyəcəyi motivasiya edici cümlənin qarşılığında isə insanların 400-500 manat pul xərcləmələri gülüncdür. Bu normal, ağıllı insanın işi deyil. Əgər mənim motivasiyaya ehtiyacım varsa, araşdıraram, oxuyaram və o motivasiyanı özüm taparam. Niyə böyük məbləğlər verib o marafonlara qoşulmaq məcburiyyəti hiss edim ki? Məgər həmin pul asan yollamı qazanılır? Bu vəziyyətin heç bir açıqlaması yoxdur".

Çiçək Sadatova

Telegramda izləyin