"Paşinyanın "Armenpresdə" yer alan iddiaları həqiqətləri təhrif etməkdən başqa bir şey deyil" - DEPUTAT

Ermənistanın baş naziri Nikol Paşinyanın "Armenpresdə" yer alan iddiaları reallıqları əks etdirmir və həqiqətləri təhrif etməklə, söz demək xətrinə danışmaqdan savayı bir şey deyil.

Artıq beş ildir ki, rəsmi İrəvan 10 noyabr üçtərəfli Bəyanatı əsasında üzərinə götürdüyü öhdəlikləri yerinə yetirmir, sülh danışıqları ilə bağlı imitasiya edir və vaxt qazanmağa hesablanmış gedişlərlə mövcud status-kvonu qoruyub saxlamağa çalışır.

Bir məqamı xüsusi olaraq qeyd etmək lazımdır ki, rəsmi Bakı Ermənistana qarşı ərazi iddiası irəli sürmür. Əksinə, onlar müstəqillik bəyannaməsində qondarma "miatsum" ideyaları ilə Azərbaycan torpaqlarını ələ keçirmək niyyətlərini bəyan edirlər.

Belə olduğu təqdirdə Azərbaycanı növbəti hərbi əməliyyatlara hazırlaşmaqda ittiham etmək və beynəlxalq hüquq müstəvisində irəli sürdüyümüz Qərbi Azərbaycana qayıdış təşəbbüsünü fərqli kontekstdə canlandırmaq cəhdləri yolverilməzdir.

44 günlük müharibədən sonra revanşist meyllər fonunda silahlanma tendensiyasını artıran, Fransa, Hindistan, İran, ABŞ kimi dövlətlərdən müxtəlif vədlər qarşılığında hücum silahları əldə edən məhz Ermənistandır. Rəsmi İrəvan iki ölkənin şərti sərhəddində mühəndis istehkam işləri həyata keçirir və Aİ missiyası çətiri altında gərginliyi artırır. Onların bu addımları birmənalı olaraq regional sülhə və sabitliyə təhdiddir.

Günay Ağamalı

Milli Məclisin deputatı, Ana Vətən Partiyasının sədr müavini

Telegramda izləyin