"Çin şirkətləri artıq Azərbaycana investisiya yatırmaqda maraqlıdır" - DEPUTAT

"Prezident İlham Əliyevin Davosda Çinin CGTN telekanalına verdiyi müsahibədə ötən il Çinin Sədri ilə görüşdən sonra Azərbaycan və Çin strateji tərəfdaşlıq üzrə Bəyannamə qəbul edildiyini bildirmişdir. Strateji tərəfdaşlıq ikitərəfli əlaqələrdə çox mühüm siyasi addım, çox yüksək səviyyəli qarşılıqlı etimad, əməkdaşlıq deməkdir. Bu baxımdan, yalnız Ümumdünya Ticarət Təşkilatına deyil, həm də müxtəlif beynəlxalq təşkilatlara qoşulma məsələsi də daxil olmaqla Çin ilə tərəfdaşlığımızın genişləndirilməsi arzuolunandır".

Bunu Sonxeber.az-a danışan deputat Şahin Seyidzadə bildirib.

Deputat qeyd edib ki, Azərbaycanın Şanxay Əməkdaşlıq Təşkilatı ilə çox yaxşı və dost münasibətləri var,təşkilatda statusu müşahidəçi deyil, dialoq üzrə tərəfdaşdır:

"Bu, həmin beynəlxalq təşkilatla daha da yaxınlaşmaq üçün güclü, qarşılıqlı iradənin göstəricisidir. Beynəlxalq təşkilatların üzv ölkələrinə nəzər salsaq, Şanxay Əməkdaşlıq Təşkilatının və BRICS-in bütün üzv ölkələrinin Azərbaycanla çox yaxşı və dost münasibətləri olduğunu görürük. Hal-hazırda coğrafi mövqeyimiz – Cənubi Qafqaz və Xəzər regionunda – Çin və Mərkəzi Asiya ölkələri ilə fəal iş aparmağımıza və bir sıra bağlılıq layihələri üzərində çalışmağımıza şərait yaradır. Azərbaycan artıq müasir nəqliyyat infrastrukturu ilə Şərqdən Qərbə gedən yol üzərində yerləşdiyinə görə, praktiki nəticələr baxımından çoxlu töhfə verə biləcəyik.

Azərbaycan Orta Dəhlizlə bağlı öz mövqeyini yalnız tranzit ölkəsi olaraq deyil, həm də bu mövqeyin özəl sektora fayda təmin edəcək şəkildə genişləndirilməsi məqsədini güdür. Dəhliz boyunca müəssisələrin yaradılması, Azərbaycanın strateji hədəflərindən biridir. Həmçinin, ölkə növbəti 5-6 ildə dəniz ticarət limanında 25 milyon ton yük qəbul etməyi hədəfləyir. Bu məqsədlə, liman və dəmir yolu infrastrukturunun genişləndirilməsi işləri davam edir. Çin tərəfindən irəli sürülən "Bir kəmər, bir yol" təşəbbüsü, yalnız ticarət imkanlarını deyil, həm də sabitlik və təhlükəsizlik baxımından ölkələrə əlavə fayda təmin edəcək. Bu təşəbbüs, yeni biznes imkanlarının yaranması ilə ikitərəfli və çoxtərəfli əlaqələrin inkişafına da müsbət təsir göstərəcəkdir".

Deputat vurğulayıb ki, Çin şirkətləri artıq yalnız xidmət və texnologiya təminatında deyil, həm də Azərbaycana investisiya yatırmaqda maraqlıdır:

"Bu, ölkəmizin strateji əhəmiyyətini və iqtisadi potensialını daha da artırır. Növbəti böyük layihə olaraq, COP29-da Azərbaycan, Qazaxıstan və Özbəkistan arasında Xəzər dənizinin dibi ilə enerji kabelinin çəkilməsi barədə razılaşma imzalanmışdır. Bu kabel xətti Mərkəzi Asiya ilə Azərbaycanı və potensial olaraq Çini birləşdirəcək, həmçinin, Qara dəniz vasitəsilə Azərbaycandan Avropaya uzanacaq. Bu layihə, yaşıl enerji üçün mühüm bir dəhliz yaratmağı hədəfləyir. Azərbaycan, külək və günəş enerjisi sahəsindəki böyük potensialı ilə yaşıl keçiddə fəal rol oynamağa davam edir.

Prezident İlham Əliyev qeyd etdi ki, Azərbaycan ilə Çin arasındakı mövcud münasibətlərin inkişafı çərçivəsində, yaxın zamanda Çin vətəndaşları viza almaq tələbindən azad edilib. Bu addım, ölkələr arasında əlaqələrin daha da möhkəmlənməsinə, turistlərin sayının artmasına və xalqlar arasında təmasların güclənməsinə səbəb olacaqdır. Ümid edilir ki, yaxın gələcəkdə Azərbaycan vətəndaşları da eyni fürsətdən yararlanacaq. Bu cür addımlar, ictimai diplomatiyanın güclənməsinə və daha sıx əlaqələrin qurulmasına kömək edəcəkdir".

Telegramda izləyin