"Müəllimin şagirdə fiziki təzyiq göstərməsi yolverilməzdir" - AÇIQLAMA

Gəncədə sinif rəhbəri 5-ci sinif şagirdini döyüb.

Bu barədə azyaşlının babası Ələddin Hüseynov danışıb. Onun sözlərinə görə, hadisə Samir Vəliyev adına 34 nömrəli tam orta məktəbdə baş verib. Ə. H.-nin sinif rəhbəri, Cavid adlı müəllim tərəfindən döyüldüyü deyilir: "Bu, ilk hadisə deyil, daha öncə də nəvəm həmin müəllim tərəfindən döyülüb. Tualetdə "niyə direktora demisən?" söyləyərək uşağı bir daha döyüb. Başını bir neçə dəfə divara çırpıb. Uşaq əli üstə yerə yıxılıb və əzilib. Hazırda əlinə sarğı qoyulub. Bütün gecəni başının ağrısından dayana bilməyib. Səhəri gün məktəbə getdik, müəllimdən uşağı niyə vurmasının səbəbini soruşduq. Kollektivin qarşısında bizə "vurmuşam, yaxşı eləmişəm" dedi".

Faktla bağlı Gəncə-Daşkəsən Regional Təhsil İdarəsi araşdırma başladıb.

Bəs görəsən müəllimin şagirdi ilə bu şəkildə davranması doğrudurmu?

Təhsil eksperti Elşən Qafarov bu barədə Sonxeber.az -a açıqlama verib:

"Bu məsələ hüquqi araşdırma tələb edir. Düşünürəm ki, hüquq müstəvisində qiymət verildikdən sonra məsələnin tam mahiyyəti aydın olacaq. Amma istənilən halda müəllimin şagirdə fiziki təzyiq göstərməsi yolverilməzdir. Bu, təhsil haqqında qanunun 33-cü maddəsində, ümumitəhsil haqqında qanunun 23-cü maddəsində öz əksini tapıb. Bu kimi hadisələr istənilən halda hüquqi araşdırma tələb edir. Valideyinin yayımladığı videodan da göründüyü kimi hüquq mühafizə orqanlarına məlumat verilib. Məsələ ilə bağlı araşdırma aparılır. Hadisəyə hüquqi qiymət verildikdən sonra bütün təfərrüatlar məlum olacaq. Göründüyü kimi uşaq 11-12 yaşlı şagirddir və istənilən halda bu hadisə ciddi məsələdir. Birmənalı şəkildə uşaqlara qarşı fiziki şiddət, cinsi zorakılıq, istismar və.s kimi hallar yolverilməzdir".

Telegramda izləyin