Mülki əhali silah-sursatı hardan əldə edir? - AÇIQLAMA

Goranboyda qayınata gəlininə əl qumbarası atıb.

Hadisə rayonun Qarasüleymanlı kəndində qeydə alınıb.

Belə ki, kənd sakini 1957-ci il təvəllüdlü Namazov Zakir Mayıl oğlu gəlini 1986-cı il təvəllüdlü Aslanova Vəfa Şükür qızı ilə ailə münaqişəsi zəminində mübahisə edib və ona doğru əl qumbarası atıb.

Bu zaman hər kəsi maraqlandıran bir sual meydana gəlir - Mülki insanlar qumbaranı, silah-sursatı hardan tapır?

Hərbi ekspert Səxavət Məmməd Sonxeber.az-ın bu sualına cavab verib:

"Bunun səbəbi müharibədir və bu, bütün müharibələrdə eynən belə olur - mülki əhalinin əlinə müxtəlif yollarla silah sursat keçir. Hesab edirəm ki, müharibədən sonra bizim bəzi vətəndaşlar silahlar əldə ediblər. Tapançalar, qumbaralar daha kiçik ölçüdədir və insanlar onları daha rahat gizlədə bilirlər. Bir şeyi də nəzərə almaq lazımdır ki, Azərbaycan nəinki 2020-ci ildə, həm də 1992-ci ildə ağır müharibədən keçib. Dövlət hal-hazırda çalışır ki, həmin silahları insanlardan yığsın. Amma buna hər kəs əməl etmir, silah-sursatı təhvil vermirlər. Ona görə də bu tip silahlanmalar bəzən ağır nəticələrlə yekunlaşır. İnsanların, xüsusilə kişilərin silaha marağı böyük olur. Müharibələr də onlara silah əldə etmək üçün münbit şərait yaradır. Hesab edirəm ki, Azərbaycanda əhalinin əlində olan silahları tamamilə almaq asan məsələ deyil. Çünki, silahlarını gizlədənlər, dövlətə təhvil verməyənlər var və olacaq da"

Çiçək Sadatova

Telegramda izləyin