"İsveç parlamentinin ölkəmiz əlehinə qəbul etdiyi qərəzli və əsassız bəyanat siyasi mənəviyyatsızlıq nümunəsidir" - DEPUTAT

"Azərbaycanın beynəlxalq müstəvidə artan nüfuzu bir çox dövlətləri və siyasi dairələri ciddi şəkildə narahat edir. 2023-cü ildə keçirilən antiterror tədbirlərindən sonra Qarabağdan könüllü olaraq köç edən ermənilər üzərindən aparılan çirkin qarayaxma kompaniyasında uğursuzluğa düçar olan qüvvələr, indi də keçmiş xunta rejiminin həbsdə olan dırnaqarası rəhbərlərindən siyasi təzyiq vasitəsi kimi istifadə etməyə çalışırlar".

Bunu Sonxeber.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib.

Deputat qeyd edib ki, İsveç parlamentinin ölkəmiz əlehinə qəbul etdiyi qərəzli və əsassız bəyanat siyasi mənəviyyatsızlıq nümunəsidir:

"Rəsmi Stokholm Azərbaycan və Ermənistan münasibətlərinin məntiqinə bələd olmadan hər zaman ermənipərəst mövqe nümayiş etdirmiş, proseslərə xristian təəssübkeşliyi prizmasından yanaşmışdır. Onların haqlı tələblərimizi görməzdən gəlməsi Avropa məkanında davam etdirilən anti-Azərbaycan ritorikasının təzahürüdür.

İsveç parlamentinin qərəzli və riyakar bəyanatı suverenliyimizə və ərazi bütövlüyümüzə qarşı hörmətsizlikdir.

Əli minlərlə günahsız insanların qanına batmış caniləri müdafiə etmək humanizm dəyərlərinin tapdalanmasıdır. Görünür rəsmi Stokholm erməni lobbisinin təsiri altında məsələni siyasi manipulyasiya alətinə çevirmək istəyir.

Azərbaycan tərəfi dəfələrlə bəyan edib ki, ittiham olunan şəxslərin taleyi qanunvericiliyin tələbləri əsasında həll olunacaq və heç bir sifariş xarakterli bəyanat prosesə əngəl ola bilməz. Belə olduğu təqdirdə köhnəlmiş formatlar fonunda təzyiq göstərmək cəhdləri uğursuzluğa məhkumdur".

Telegramda izləyin