"Azərbaycan ilə Şimali Makedoniya arasında əməkdaşlıq hər iki ölkənin iqtisadi inkişafına müsbət təsir göstərəcək" - Bəhruz Quliyev

"Bu günlərdə Şimali Makedoniya prezidentinin Azərbaycana səfəri iki ölkə arasında yeni əlaqələrin yaranmasına, yeni əməkdaşlıq istiqamətlərinin inkişaf etdirilməsinə imkanlar yaradıb. Azərbaycan Respublikasının Prezidenti İlham Əliyev və Şimali Makedoniya Respublikasının Prezidenti Qordana Silyanovska-Davkova mətbuata bəyanatlarla çıxışlarında da münasibətlərə yenidən baxılacağına, növbəti addımlar atılacağına əminlik vurğulandı".

Bu sözləri Sonxeber.az-a danışan Səs qəzetinin baş redaktoru, siyasi ekspert Bəhruz Quliyev deyib.

Ekspert qeyd edib ki, Azərbaycanla Şimali Makedoniya Respublikası arasında baxmayaraq ki, indiyə qədər çoxsahəli əməkdaşlıqlar olmayıb, amma son illərdə müxtəlif sahələrdə əhəmiyyətli dəyişikliklər müşahidə olunur. Bu əməkdaşlıq əsasən enerji, kənd təsərrüfatı və ticarət sahələrini əhatə edir:

"İlk növbədə qeyd edim ki, enerji sahəsində 2024-cü ilin noyabr ayında Azərbaycan Dövlət Neft Şirkəti (SOCAR) ilə Şimali Makedoniyanın "ESM" Səhmdar Cəmiyyəti arasında "Enerji sahəsində əməkdaşlığın genişləndirilməsinə dair Anlaşma Memorandumu" imzalanıb. Bu sənəd, Şimali Makedoniyanın enerji təhlükəsizliyinin gücləndirilməsi və təbii qaz mənbələrinin şaxələndirilməsi məqsədini güdür. Anlaşmaya əsasən, tərəflər Azərbaycan təbii qazının Şimali Makedoniyaya təchizatını artırmaq və enerji sahəsində digər layihələri inkişaf etdirmək niyyətindədirlər.

Xatırlatmaq istəyirəm ki, kənd təsərrüfatı sahəsində də 2023-cü ilin noyabr ayında Azərbaycan Kənd Təsərrüfatı Nazirliyi ilə Şimali Makedoniya arasında "Kənd təsərrüfatı sahəsində əməkdaşlıq memorandumu" imzalanıb. Bu memorandum bitkiçilik, heyvandarlıq, aqrar təhsil və mütəxəssis hazırlığı kimi sahələrdə birgə işçi qrupunun yaradılmasını və əməkdaşlığın genişləndirilməsini nəzərdə tutur.

Qeyd etdiyimiz kimi, Şimali Makedoniya prezidentinin budəfəki səfərində siyasi, ticari-iqtisadi əlaqələrin daha da genişləndirilməsi barədə prezidentlərin bəyanatında da mesajlar var idi.

Xatırlatmaq istəyirəm ki, Azərbaycan və Şimali Makedoniya arasında ticarət dövriyyəsinin artırılması üçün müntəzəm ünsiyyət kanallarının yaradılması və biznes forumlarının təşkili planlaşdırılır. Bu tədbirlər, hər iki ölkənin bazarlarında qarşılıqlı maraqları artırmaq və iqtisadi əlaqələri möhkəmləndirmək məqsədi daşıyır.

Ümumiləşdirib demək olar ki, Azərbaycan ilə Şimali Makedoniya arasında əməkdaşlıq, siyasi, elmi, enerji təchizatının şaxələndirilməsi, kənd təsərrüfatı sahəsində bilik və təcrübə mübadiləsi, eləcə də ticarət əlaqələrinin inkişafı kimi sahələri əhatə edir. Sözsüz ki, bu əməkdaşlıq, hər iki ölkənin iqtisadi inkişafına və regional sabitliyə müsbət təsir göstərəcək".

Telegramda izləyin