"Boşanmaların 70 faizinin təşəbbüskarı qadınlardır" - Şöbə müdiri

Boşanmaların 70 faiz təşəbbüskarı qadınlardır.

Sonxeber.az xəbər verir ki, bunu Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin müdiri Taliyə İbrahimova "Ailə, qadın və uşaq hüquqları - konstitusion hüquqların əsas prioriteti kimi" mövzusunda parlamentdə keçirilən ictimai dinləmədə çıxışı zamanı deyib.

Onun sözlərinə görə, əvvəlki illərdə erkən nikahla bağlı qanunvericiliyə edilən dəyişikliklər yetərli olmayıb:

"Məsələn, hələ də doğulan uşaqların 15 faizinin nikahdankənar olması ilə bağlı narahatlıq doğuran statistika var. Bundan başqa, anomaliya ilə doğulan uşaqların sayında 65 faiz, talassemiyalı uşaqların sayında isə 86 faiz artım var. Həmçinin üç və daha artıq uşağı olan ailələrin sayı getdikcə azalır. Çoxuşaqlı ailələrin sayını artırmaq üçün qanunvericiliyə yenidən baxmalıyıq".

Şöbə müdiri bildirib ki, doğulan uşaqların cins nisbətində ciddi problem var və bu səbəbdən reproduktiv sağlamlıqla bağlı qanunun qəbulu vacibdir:

"Alimentin ödənilməsi problemi, Aliment Fondunun yaradılması da gündəmdədir. Qanunvericilik sərtləşdirilsə də, borcluların 70 faizindən çoxu işsiz, gəliri olmayanlardır. Ona görə də Aliment Fondunun yaradılması vacibdir".

Dövlət Komitəsinin rəsmisi əlavə edib ki, boşanmaların 70 faizinin təşəbbüskarı qadınlardır:

"Onlar xasiyyətlərinin uyğun gəlmədiyini əsas gətirirlər, amma təcrübə daha dərin problemlərin olduğunu göstərir. Ona görə də ailə qanunvericiliyinin təkmilləşdirilməsi ilə bağlı təkliflər hazırlanıb və bu yaxınlarda Milli Məclisə təqdim olunacaq".

T.İbarahimova həmçinin vurğulayıb ki, qəsdən adam öldürmə cinayətlərinin əksəriyyəti ailə-məişət zəminindədir:

"Eyni zamanda adam oğurluqlarının əksəriyyəti qızqaçırmalardır və bu da ciddi problemdir".

Telegramda izləyin