"Boşanmaq istəyən cütlüklərlə psixoloji söhbət edərək onları fikirlərindən daşındırmaq olar" - AÇIQLAMA

"Ədliyyə Nazirliyi nikahın pozulması zamanı cütlüklərin psixoloqa yönləndirilməsinin qanunvericilikdə təsbitini tapması ilə bağlı təklfilər hazırlayır" - bunu ədliyyə nazirinin müavini Abiddin Hüseynov Milli Məclisdə keçirilən "Konstitusiya və Suverenlik İli" çərçivəsində "Ailə, qadın və uşaq hüquqları konstitusion hüquqların əsas prioriteti kimi" mövzusunda ictimai dinləmədə deyib.

Bəs görəsən bu addım boşanmaların qarşısını ala bilərmi?

Mövzu ilə bağlı psixoloq Aytən Ələkbərova Sonxeber.az -a açıqlama verib:

"Əgər belə bir təklif irəli sürülübsə, inanıram ki, bunun müəyyən qədər faydası olacaq. Ən kiçik narazılıqda boşanmaq istəyənlərin qarşısının alınması üçün biz hər zaman çalışırıq. Bəzən, nəinki tədricən, hətta, dərhal nəticə də əldə edirik. Deməli, bu təşəbbüs faydalı ola bilər.

Boşanmaların səbəbi bəzən üçüncü, dördüncü şəxslərin ailələrə müdaxilə etməsi olur. Əgər boşanma halları bu tip hadisələrə görə baş verirsə, deməli cütlüklərlə psixoloji söhbət edərək bunun qarşısını almaq olar.

Mən bir psixoloq olaraq özümə güvənib deyirəm ki, bu günə qədər təxminən 100-dən artıq pasiyentim psixoterapiyadan sonra boşanmaq qərarından imtina edib. Hətta boşandıqdan sonra barışan cütlüklər də olub. Əgər bu, tək bir psixoloqun fərdi seansında baş verirsə, deməli toplu olaraq belə bir təşəbbüs irəli sürülsə istənilən nəticə əldə ediləcək. Bir psixoloq olaraq, bu təklifi dəstəkləyirəm"

Telegramda izləyin