"Azərbaycan və Şimali Makedoniya arasındakı əlaqələrin mədəni və humanitar sahədə də inkişaf etdirilməsi vacibdir" - DEPUTAT

"Azərbaycan və Şimali Makedoniya arasında diplomatik münasibətlər 1995-ci ildə hər iki dövlətin bir-birinin müstəqilliyini qarşılıqlı tanıması ilə qurulub. 2023-cü ildə isə Azərbaycan Respublikasının Serbiyadakı səfiri eyni zamanda, Şimali Makedoniyaya təyin edilib. Bununla yanaşı, Şimali Makedoniya Azərbaycanda akkreditə olunmuş səfirlik vasitəsilə diplomatik fəaliyyətini davam etdirir".

Bunu Sonxeber.az-a danışan deputat Vasif Qafarov bildirib.

Deputat qeyd edib ki, 2000-ci ildə Şimali Makedoniya və Azərbaycan parlamentlərarası işçi qrupunun yaradılması ilə Azərbaycan və Şimali Makedoniya arasında parlamentlərarası əməkdaşlıq qurulub və bu əməkdaşlıq uğurla davam etdirilir:

"Hüquqi baza baxımından isə iki ölkə arasında 5 rəsmi sənəd imzalanıb ki, bunlardan ən önəmlilərindən biri sərmayələrin qorunması və vergitutmanın qarşısının alınması ilə bağlı sazişlərdir. Dövlət başçılarının mütəmadi görüşləri, diplomatik münasibətlərin inkişafı, enerji sektoru üzrə əməkdaşlıq fonunda demək olar ki, Azərbaycan və Şimali Makedoniya əməkdaşlığının yeni dövrü başlayıb.

Azərbaycan Respublikasının Prezidenti İlham Əliyev və Şimali Makedoniya Respublikasının Prezidenti Qordana Silyanovska-Davkovanın Azərbaycana rəsmi səfəri çərçivəsində mətbuata verdikləri bəyanatlar iki ölkə arasındakı münasibətlərin inkişaf istiqamətlərini aydın şəkildə ortaya qoyub. Bu münasibətlər siyasi, iqtisadi və humanitar sahələrdə genişlənir, iki dövlət arasındakı siyasi əlaqələr getdikcə güclənir. Prezident İlham Əliyevin də qeyd etdiyi kimi, ölkələr arasındakı siyasi dialoq dinamik xarakter alır və əlavə tədbirlərlə daha da möhkəmləndirilməlidir. İqtisadi sahədə əməkdaşlığın hələ arzu olunan səviyyədə olmamasına baxmayaraq hər iki tərəf bu istiqamətdə fəal addımlar atır. Enerji sektoru üzrə əməkdaşlıq isə artıq mühüm nəticələr verir. Şimali Makedoniya bazarına Azərbaycan qazının çatdırılması bu sahədə mühüm irəliləyişlərdən biridir. 2024-cü ilin sonlarında həyata keçirilən bu prosesin davamlı olması və gələcəkdə qaz tədarükünün artırılması nəzərdə tutulub. Azərbaycan hazırda 12 ölkəyə təbii qaz ixrac edir ki, bunlardan 10-u Avropa ölkəsidir. Azərbaycanın xarici bazarlara qaz tədarükünü artırmaq potensialı var ki, bu da Şimali Makedoniya ilə iqtisadi əməkdaşlığın yeni mərhələyə keçməsinə imkan yaradır".

Deputat vurğulayıb ki, iki ölkə arasındakı əməkdaşlıq yalnız siyasi və iqtisadi sahələrlə məhdudlaşmır. Mədəni və humanitar sahədə də əlaqələrin inkişafı vacibdir:

"Şimali Makedoniya Prezidenti Qordana Silyanovska-Davkovanın Azərbaycana səfəri çərçivəsində ölkənin mədəni həyatı ilə yaxından tanış olması, Nizami Gəncəvi Beynəlxalq Mərkəzi tərəfindən təşkil olunacaq XII Qlobal Bakı Forumunda iştirakı və tələbələrlə görüşü yüksək qiymətləndirilməlidir. Bu cür tədbirlər xalqlar arasında mədəni və humanitar əlaqələrin güclənməsinə töhfə verir.

Azərbaycan və Şimali Makedoniya arasındakı münasibətlər tədricən genişlənməkdədir. Siyasi dialoqun dinamikliyi, iqtisadi əlaqələrin dərinləşdirilməsi və humanitar əməkdaşlığın inkişafı iki ölkənin daha sıx əlaqələr qurmasına şərait yaradır. Xüsusilə enerji sahəsində başlayan əməkdaşlıq gələcəkdə digər sektorlara da təsir göstərə bilər. Bu istiqamətdə davam edən səylər hər iki ölkənin qarşılıqlı maraqlarına xidmət edir və gələcək əməkdaşlıq perspektivlərini daha da möhkəmləndirir".

Telegramda izləyin