"Ay Lolo"nu bir də belə dinləyin - "Nənələr"imiz haqqında BİLMƏDİKLƏRİMİZ - VİDEO

Lənkəranın limonu, çayı, bir də "Nənələr" qrupu... Bu qrup o qədər tanınıb, sevilib ki, artıq Lənkəranın simvollarından birinə çevrilib, ikonlaşıb. Boşuna "ikonlaşıb" demirəm. Yadımdadır, 2 il əvvəlin yazında Lənkərana gəlmişdim. Hansı bölgəmizə getsəm, ilk gəzdiyim yer həmin rayonun bazarı olur. Burada ən maraqlı insanları, obrazları görmək mümkündür. Bazarlar toplumun altşüurudur. Lənkəran bazarında gördüyüm ən maraqlı "məhsullardan" biri də nənələrin gipsdən hazırlanmış minimalist maketi idi.

Lent.az-ın əməkdaşı sizə APA TV-nin müxbirinin dilindən ordakıları nəql edəcək.

Bu dəfə isə məhz "Nənələr"in özlərini görməyə gedirəm. Bu il onların 55 illik yubileyidir. Reportaj hazırlayacağımızdan əvvəlcədən xəbərləri var idi. Maşının üzərindəki "APA TV" loqosu və əlimizdəki texniki avadanlıqlardan bizi tanıyırlar. Qızbəs nənə bir əlində qaval, digər əliylə bizi salamlayır:

- Xoş gəlmisiz, həmişə siz gələsiniz!

Yenə eyni geyimdə, eyni sıra ilə düzülüblər. Bu sıra ardıcıllığı heç vaxt dəyişmir. Daha əvvəl də onlar haqqında hazırlanan reportajları izləmişəm. Hamısında sıra eynidir - Qızbəs Əhədova, Gülbəzək Kərimova, Rübabə Kərimova, Zibər Məmmədova, Bacıgül Məmmədova, Şərəf Məmmədova.

Aralarında ən yaşlısı Xanımbacı nənənin 91 yaşı var. Qızbəs nənə deyir ki, Xanımbacı nənə səhhətiylə əlaqədar səhnələrə çıxa bilmir.

"Nənələr" qrupunu həmişə "Ay Lolo" mahnısı ilə xatırlayıram. Mənə elə gəlir ki, bu mahnıdakı "qızıl üzük laxladı" (Ay lolo, qızıl üzük laxladı. Ay lolo, verdim, anam saxladı) ifadəsi azyaşlı qızların ərə verilməsinə bir işarədir. Qız o qədər balaca olur ki, nişan üzüyü barmağına böyük gəlir və düşüb itməsin deyə, saxlamağı üçün anasına verir.

Qrup ilk dövrlərdə özünü "Bacılar" adlandırıb. Yanaqları şaftalı çəyirdəyi kimi qırışmış Qızbəs nənə indi bizə daha ətraflı danışacaq:

- Bu qrup yarananda balaca idik. Kənddə toy, xınayaxdı olanda bizi aparırdılar. 4 bacı idik. Sonra Şövkət xanım bir toyda bizi görüb bəyəndi. Dedi, sizi göydə axtarırdım, yerdə tapdım. Bizi Bakıya, başqa şəhərlərə apardı.

Yadıma gəlir, 2012-ci ildə ruslar öz "Nənələr"ni "Eurovision" mahnı müsabiqəsinə çıxarmışdılar. Açıq desəm, rus "babuşka"larının bizim "nənə"lərdən heç bir üstün özəlliyi yox idi. Hətta milli köklərə söykənən "Lənkəran Nənələr"i daha maraqlı və yaradıcıdılar.

Qrupun üzvü Rübabə Kərimova deyir ki, məqsədimiz adət-ənənələrimizi uşaqlara, qız-gəlinlərimizə ötürməkdir:

- Biz bu adət-ənənələri qoruyub saxlayırıq.

1997-ci ildə "Bacılar" dönüb "Nənələr" oldular. Bəli, Qızbəs nənə özü deyir:
- Heydər Əliyev qatarla gəlmişdi. Stansiyadan düşəndə insan əlindən yer yox idi. Mən ona gül verdim. Bizimlə görüşdü və "Nənələr" adı verdi.

Qrup Vətən Müharibəsindən sonra işğaldan azad edilmiş torpaqlarda keçirilən konserlərdə də iştirak edib. "Nənələr"in Zibər Məmmədovası deyir ki, Şuşa, Laçın, Ağdamda olmuşuq və gözəl təəssüratlarımız var.

İndi öyrənirəm ki, oxuduqları mahnıları "Nənələr" özləri yazırlar. Həqiqətən, o mahnıların sözləri, ifadə tərzləri o qədər təmiz və sadədir ki, onları oxuduqları folklor mahnılarından ayırmaqda çətinlik çəkirəm. Bunu öyrənəndən sonra "Nənələr" mənə oxuduğum nağıllarda nəvələrinə özlərindən şeirlər, bayatılar qurub-qoşan nənə obrazlarını xatırladır. Geyimləri, hərəkətləri bu obrazı tamamlayır.

Şərəf Məmmədova bu qrupdakı ilk konsertindən danışır:

- İlk dəfə bu qrupa qoşulanda Novruz şənliyi keçirilirdi, biz prezident İlham Əliyevin qarşısında oxuyurduq. İlk konsertim belə olub. Çox həyəcanlı idim.

Bacıgül Məmmədovanın isə arzusu "Nənələr"ə qoşulmaq imiş:

- Çox istəyirdim nənələrə qoşulum. Şükür Allah indi onlarla oxuyuram...

Son olaraq onlardan mahnı oxumalarını xahiş edirəm. Yenə eyni sıra ilə düzülürlər. Qızbəs nənə əlindəki qavala vurmağı ilə "Ay Lolo" mahnısını oxumağa başlayırlar. Oxuya-oxuya gah sağ, gah sol tərəfə dönüb əl çalırlar.

Lənkəran uzunömürlülər diyarıdır. Onlara uzun ömür və hər zaman belə oxumaqlarını, qruplarına yeni nənələr qatmağı arzu edirik...

Telegramda izləyin