"Böyük qürur və fərəh hissi ilə beş ildir ki, Novruz bayramını Azərbaycanımızın hər bir guşəsində qeyd edirik" - DEPUTAT

"Rəşadətli Azərbaycan ordusu Müzəffər Ali Baş Komandan İlham Əliyevin rəhbərliyi ilə Vətən müharibəsini tarixi Qələbə ilə başa vuraraq, 30 ilə yaxın işğal altında olan ərazilərimizi işğaldan azad etməklə yanaşı, 2023-cü ilin sentyabr ayında bir gündən daha az davam edən antiterror əməliyyatı nəticəsində suverenliyimizi tam bərpa etdi.  Artıq beşinci ildir ki, Novruz bayramı bu torpaqlarda təntənəli şəkildə qeyd olunur. Cənab Prezident İlham Əliyev ötən il Xankəndi şəhərində Novruz bayramı münasibətilə təbrikində demişdir: "Dördüncü dəfədir ki, bayram tonqalı azad edilmiş Qarabağ torpağında qalanır. 2021-ci ildə Şuşada, 2022-ci ildə Suqovuşanda, keçən il Talış kəndində, bu dəfə isə Xankəndi şəhərində bayram tonqalı qalanır". Əlbəttə, bu, Azərbaycan xalqı üçün qürur və fəxr mənbəyidir. Müzəffər Ali Baş Komandan İlham Əliyev güclü əzm və iradə ilə Ulu Öndər Heydər Əliyevin vəsiyyətini və Azərbaycan xalqının arzularını reallaşdırdı. Bu əvəzolunmaz qüruru və xoşbəxtliyi bizə bəxş edən qəhrəman şəhidlərimizin xatirəsini həmişə hörmət və şükranlıqla yad edirik".
 
Bu fikirləri Sonxeber.az-a açıqlamasında Milli Məclisin üzvü Tamam Cəfərova deyib.
 
Deputat bildirib ki, Novruz bayramı Azərbaycan xalqının çoxçalarlı incəsənətin güzgüsüdür, habelə milli mədəniyyətimizdə sülh, mehriban qonşuluq və tolerantlıq kimi ümumbəşəri dəyərlərə sadiqliyinin tarixi təcəssümüdür. Novruz bayramı bəşəri mənəvi dəyərdir. Beləki, İslamdan əvvəl tarixi dövrə təsadüf olunan Novruz bayramı Azərbaycanla yanaşı bütün Şərqdə qeyd olunur. Novruz təkcə onu keçirən türk xalqlarının deyil, ümumilikdə bəşəriyyətin mənəvi dəyəri hesab edilir. 23 fevral 2010-cu ildə BMT Baş Assambleyasının 64-cü sessiyasının iclasında martın 21-i "Beynəlxalq Novruz Günü" elan olunub. 28 noyabr - 2 dekabr 2016-cı il tarixlərində Efiopiyanın Əddis-Əbəbə şəhərində keçirilmiş UNESCO-nun Qeyri-Maddi Mədəni İrs üzrə Hökumətlərarası Komitəsinin 11-ci sessiyasında İraq, Qazaxıstan, Tacikistan, Türkmənistan və Əfqanıstan da Novruz bayramı nominasiyasına qoşulub.

Onu da qeyd etmək lazımdır ki, Novruz bayramı özündə ümumbəşəri dəyərləri, habelə sülhü və tolerantlığı tərənnüm edir. Azərbaycan xalqının milli adət-ənənəsinə görə Novruz bayramında küsülülər barışmalı, qohumlar bir-birini ziyarət edib, bayram süfrələri açmalıdırlar. İnsanlar baharın gəlişi ilə torpağın əkib-becərilməsinə başlayır.
 
Ulu Öndər Heydər Əliyevin Novruz bayramı ilə əlaqədar sözlərini xatırladan millət vəkili Tamam Cəfərova qeyd edib ki, Ümummilli Lider 2000-ci ildə Azərbaycan xalqını təbrik edərkən deyib: "Novruz bayramının bizə bəxş etdiyi ən gözəl nemət ondan ibarətdir ki, qədim zamanlardan bu bayramda insanlar kin-küdurəti unudur, küsülülər barışır, ziddiyyətlər aradan götürülür. Demək, bu, dostluq, həmrəylik, yüksək mənəviyyat bayramıdır." Ulu Öndərin bu sözlərinin fonunda ölkəmizdə siyasi proseslərdə formalaşmış bayramlaşma təcrübəsini xüsusilə qeyd etməliyik. Belə ki, Novruz ölkəmizin siyasi proseslərində bayramlaşma təcrübəsinə səbəb olmuşdur. Novruz bayramı münasibətilə Azərbaycan Respublikasının Prezidenti cənab İlham Əliyev ilə ölkəmizdə fəaliyyət göstərən siyasi partiyaların rəhbərləri arasında qarşılıqlı bayramlaşma ölkədə yeni, mütərəqqi siyasi mədəniyyətin təşəkkülünü göstərir.
 
Böyük qürur və fərəh hissi ilə artıq beş ildir ki, qədim Novruz bayramını Azərbaycanımızın hər bir guşəsində qeyd edirik. Xatırladaq ki, 2021-ci ildə cənab Prezident İlham Əliyev Novruz tonqalını Şuşada, Cıdır düzündə yandıraraq demişdi: "Bilirəm, hər birimiz, xüsusilə keçmiş məcburi köçkünlər hər dəfə bayram ərəfəsində və bayram günlərində deyirdik ki, İnşallah, gələn il azad edilmiş torpaqlarda, Qarabağda Novruz bayramını qeyd edəcəyik və artıq bu, reallıqdır... Bu gözəl bahar bayramını biz işğaldan azad edilmiş torpaqlarda qeyd edirik. Şadam və xoşbəxtəm ki, artıq bu, bir ənənəyə çevrilib və Novruz bayramını biz burada, doğma Qarabağ diyarında qeyd edirik."
 
Bir daha başda Müzəffər Ali Baş Komandan, cənab Prezident İlham Əliyev olmaqla Azərbaycan xalqını Novruz bayramı münasibətilə təbrik edir, hər kəsə can sağlığı, xoşbəxtlik, firavan həyat, bol ruzi-bərəkət arzulayıram.

Telegramda izləyin