Bu şəxslərə ŞAD XƏBƏR - Mağazalarda sizi GÜZƏŞTLƏR GÖZLƏYİR!

Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondu (DSMF) sosial ödəniş alan şəxslərə dəstək məqsədilə "Sosial tərəfdaş" adlı yeni layihəyə başlayıb. Bu təşəbbüs artıq iki il əvvəl başladılıb, lakin çox insan layihənin mövcudluğundan xəbərsizdir. Araşdırmalar göstərir ki, bu proqram çərçivəsində müxtəlif xidmət və ticarət sahələrində əlillərə, şəhid ailələrinə və digər həssas sosial qruplara müəyyən güzəştlər və endirimlər təqdim edilir.

Buna baxmayaraq, layihənin tətbiqi və əlçatanlığı ilə bağlı məlumatlandırma səviyyəsi aşağı olduğundan, hədəf qruplarının əksəriyyəti bu imkanlardan yararlanmır. Bu baxımdan, proqramın daha geniş şəkildə tanıdılması və vətəndaşların ondan faydalanmasını asanlaşdıracaq addımların atılması vacibdir.

İqtisadçı Rəşad Həsənov bu barədə "Yeni Sabah"a danışıb.

O bir sıra vacib məqamlara toxunub:

"Bu sahədə hər hansı hüquqi tənzimləmə və ya konkret qanunvericilik çərçivəsi mövcud deyil. Sözügedən sosial kart və ona əsaslanan güzəştlər daha çox bazar iştirakçılarının öz imkanları daxilində həyata keçirdiyi təşəbbüslər kimi ortaya çıxır. Bir sıra pərakəndə ticarət və xidmət müəssisələri bu imkandan yararlanaraq, sosial məsuliyyət və müştəri loyallığını artırmaq məqsədilə əlil qazilər və onların ailə üzvləri üçün müəyyən güzəştlər təklif edirlər".

Ekspert bildirib ki, güzəştlərdən yararlanmaq üçün əsas şərt müvafiq sosial karta sahib olmaq və ya həmin sosial qrupun üzvü olduğunu təsdiqləyən sənədləri təqdim etməkdir:

"Bu proses, adətən, müəyyən qeydiyyat prosedurlarını əhatə edir və müraciət əsasında həyata keçirilir. Yəni, vətəndaşın güzəştdən faydalanmaq üçün bu imkandan xəbərdar olub, müvafiq qaydada müraciət etməsi tələb olunur".

İqtisadçı onu da qeyd edib ki, sistem könüllü əsasda qurulduğu üçün kampaniyaya qoşulan şirkətlər üçün xüsusi və məcburi tələblər müəyyən edilməyib:

"Hər bir müəssisə güzəşt şərtlərini və prosedurlarını öz daxili qaydalarına uyğun olaraq müəyyənləşdirir. Bu səbəbdən güzəştlərin tətbiq dairəsi və mexanizmləri müxtəlif şirkətlərdə fərqli ola bilər".

Telegramda izləyin